叱咤頒獎禮2023｜尹光殺入「我最喜愛男歌手」最後5強 張敬軒歌迷奇招拉票
發佈時間：14:55 2023-11-24
《2023年叱咤樂壇流行榜頒獎典禮》將於2024年1月1日晚在亞博舉行，「叱咤樂壇我最喜愛的男歌手、女歌手、組合」第二階段投票已於本周正式展開，今日（24日）商台公佈最新五強走勢，79歲的尹光走勢依然強勁，更成功躋身五強位置。
【相關閱讀】：張敬軒入叱咤「五強」當贏視尹光為偶像 感激Fans派傳單拉票似選區議會
【點擊睇叱咤我最喜愛的男女歌手及組合5強】：
「我最喜愛的男歌手」5強之列包括有尹光、張敬軒、MIRROR成員盧瀚霆（Anson Lo）、姜濤、陳卓賢（Ian），而MC張天賦、呂爵安（Edan）均告出局；「我最喜愛的女歌手」5強分別是Gin Lee（李幸倪）、Serrini、陳蕾、鄭欣宜、謝安琪；至於，「我最喜愛的組合」方面，有COLLAR、Dear Jane、ERROR、Lolly Talk、MIRROR。
「光B」尹光成熱門人馬
今屆「我最喜愛男歌手」戰況激烈，「光B」尹光更成為熱門人馬，各粉絲為偶像都各出其謀努力拉票。日前，一位張敬軒粉絲便想出奇招，用膠紙在家中窗戶大大隻字貼上「請投張敬軒一票」，並在帖文寫道：「我冇咁大勇氣喺街派傳單，但又想做啲嘢喎，除咗諗吓仲有邊啲人有機會投票之外，諗諗吓記得上次打風貼咗Hins字，今次又搵返隻窗嚟玩吓，雖然知道成效唔會大，但做咗就有機會，多一票就係多一票，唔做連少少機會都冇㗎喇……」創意十足，就連軒公都非常感動，並轉載答謝該歌迷謂：「我有乜嘢理由唔努力」 。
呂爵安被foul出5強
呂爵安（Edan）5強不入，今午（24日）他在社交網的粉絲交流區跟爵屎（粉絲暱稱）互動，有爵屎留言稱：「盡咗力投票了﹗」Edan則留言表示感謝：「辛苦大家了﹗見到大家好努力，多謝你哋！」其後，Edan 更派福利貼出短片，自彈自唱即將播映的港版《社內相親》新歌安撫粉絲，並表示：「啱啱起身亂彈亂唱不要介意 #你的黑馬」更冧爆謂：「大家唔好傷心啦」。
李幸倪拍片感謝粉絲
Gin Lee 在社交平台拍片分享感受，她先感謝粉絲、朋友、屋企人和同事們為她努力拉票，並興奮表示：「成功入到五強，好想多謝大家投票俾我，我可以話俾大家知，今次嘅感受係前所未有嘅激動，好多謝你哋咁支持我」
Gin Lee 更表示她與粉絲性格都比較內斂，對於獎項都是抱着一個隨緣的心態，「琴日知道有好多人喺背後支持我嘅時候，我已經感動到落淚，去到今日收到好消息，見到大家嘅努力冇白費到，所以我好想多謝你哋」她續指今年好俾心機去做好自己，亦都衝破好多心理關口作新嘗試，希望大家見到她的努力；接著，Gin Lee 更派福利清唱了多首今年曾推出過的作品，並為下星期一最後一輪的投票作出拉票。
【其他文章】：
叱吒頒獎禮2023丨尹光走勢強勁成功躋身7強 AK Jer兩鏡仔孖林家謙被踢出局
叱咤頒獎禮2023丨姜糖疑於港鐵站外「區議員式」拉票 姜濤恐再失最愛男歌手寶座被尹光奪位？
尹光打入叱咤十強挑機半隊MIRROR 預告參加頒獎禮：入到五強都偷笑
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
