TVB「御用惡人」彭皓鋒驚爆患直腸癌 接受斷食治療法延後原訂11月手術
發佈時間：11:10 2023-10-31
由李麗霞（黑妹）號召、韋綺珊及彭家麗等有份演出的《星濟好聲音慈善音樂會》，昨晚（30日）在文化中心舉行，並為兒童癌病基金成功籌得過百萬。音樂會上，彭家麗細佬彭皓鋒上台獻唱時，就突然自爆患上直腸癌。
【相關文章】：彭皓鋒慶幸疫情下仍有不俗工作量：喺內地有好多人識我
【點擊睇彭家麗彭皓鋒同台】：
雖然昨晚開騷，但身為主角之一的彭家麗在開騷前兩日失聲，令黑妹急請來剛從泰國返港的羅敏莊代唱，但彭家麗在開場時也有上台與三人合唱，更即場示範講嘢走音，並向觀眾致歉，但笑言現在可以和主席合唱，而黑妹則指彭家麗並沒有失場，因她會全晚在後台。 音樂會中段，彭家麗細佬彭皓鋒上台與羅敏莊合唱《從不喜歡孤單一個》，他指參與這次音樂會很有意義，因媽媽也是因癌症離世，他突然自爆7月做身體檢查時發現患上直腸癌，所以想借今次機會出一分力，他指自患病後能感同身受到病人的惶恐，但他亦坦言家人的擔心會成為患者的負擔，呼籲大家也樂觀地面對，因為開心是最好的靈藥，到獻唱時，彭家麗亦特意上台支持細佬，並擁抱細佬說：「希望你早日康復，大家都早日康復！」
彭皓鋒透露患上直腸癌是2-3期
彭家麗與彭皓鋒完騷後一起受訪，彭皓鋒透露患上直腸癌是2至3期，原本預計在11月中接受手術，但因有朋友試過用斷食治療後抗癌成功，故自己也嘗試此療法：「我照顧暫時（癌細胞）冇擴散，因為腫瘤好近肛門，如果有咩事就要開造口，之前試過食中藥3個月，但冇變化，而家先試20日斷食療程，有進展就唔使做手術，唔得就會係香港接受化療。」至於會否暫停幕前工作？他指要看情況，因為現時斷食了3日，發現唱歌也沒有氣。
黑妹早年成功抗癌，問到是否有向對方請教？彭皓鋒說：「都有，佢係過來人，知道身邊有好多方法，佢話最緊要開心，你想用咩方法就用咩方法。彭皓鋒又謂有時候家人的關心會成為自己的無形壓力：「佢哋唔係想做唔好嘅嘢，只係佢哋擔心，好似我老婆咁，佢都唔想喊，但佢一聽到呢個消息，基本上頭兩個月日日都喊，佢都忍唔到。」不過幸好手術費上得到爸爸、大家姐及彭家麗的支持，令他可以專心養病，盡快照顧好身體。
彭家麗受細菌感染開騷前失聲
彭家麗坦言得知細佬患癌後心情不舒服，亦有為細佬到處找醫生朋友，但因已經有很多朋友介紹，意見太多變得很難選擇，對於在開騷失聲，彭家麗指是受細菌感染，自己剛在後台聽到別人唱她的歌也會覺得不開心：「下年入行35周年，我從未試過因為病而失場，我未聽過自己把聲咁難聽，噚日知道把聲係咁都好驚。」
對於彭皓峰患上直腸癌，黑妹指自己早已得知此事：「佢係我細佬，佢跟咗我咁多年，佢第一時間同我講，我叫佢唔好驚，因為有癌症嘅人第一時間係會崩潰，只係佢身體多咗少少嘢，對症下藥去醫。我都唔知佢會公開，我唔會畀好多意見，上天會安排，希望佢早日康復。」黑妹亦表示對今次音樂會感到很滿意，很感謝所有朋友支持。至於被臨時拉夫獻唱的羅敏莊，就指契媽黑妹打電話給她時即一口答應，更指為慈善不問酬勞，羅敏莊指身為歌手也會明白彭家麗失聲的痛苦，她說：「有啲人會靠打針開聲，但我同契媽都叫彭家麗唔好打針，因為打針好傷把聲，後遺症亦好大鑊，如果可以幫到手我就幫啦！」
【其他閱讀】：
黑妹李麗霞舉辦慈善音樂會 周吉佩 羅啟豪 龍婷 顏志恆無條件支持
