星8卦｜「猛男」衰寸被杯葛難得復出故態復萌火速被飛

更新時間：11:00 2023-10-10
發佈時間：11:00 2023-10-10

因為臭寸喺最當打時候俾劇組飛起嘅「猛男」完全唔知錯，加埋娶嫩妻之後可以咬軟，品性就更加乞人憎。但男人嘅自尊唔可以長期被壓抑，嫩妻亦覺得老公有啲唔妥，幫佢搵咗個真人騷做，希望佢搵番啲自信。

「猛男」個名都花咗，老婆托咗好多關係至整到佢有工開，仲吩咐佢生性做人。鬼整佢第一、二個星期仲正正常常，但去到第三個星期「猛男」又開始見人唔睬，成日遲到，自己又cheap唔捨得請個好啲嘅助理，貪平搵咗個𡃁仔，完全唔識幫佢打點人情關係。初時製作組都會忍下，但久而久之太多人投訴，最高領導人覺得唔使畀面，就喺嗰個星期決定要佢返屋企。

不過好彩都有人陪，另一位啱啱宣布回復單身嘅「煩人」亦同佢一樣遭遇，火速俾人叮走，原因都係寸過碼頭咕喱，仲要唔合作，叫佢做乜都有理由話唔啱自己，激到監製生蝦咁跳，未夠三日已經叫佢執包袱，所以論瘀仲有「煩人」墊底。「猛男」咁快返歸，初時都驚老婆日哦夜哦，點知嫩妻非常高興，歡迎老公返嚟身邊，唔使再擔心國內啲女仔埋身，到時又要出手對付，而家落得安心，畢竟兩公婆唔係等錢開飯。