獨家丨向展鵬信佛習慣被攻擊:話我又唔會死 參加《好聲音2》被起底澄清年薪唔止千萬
更新時間:07:00 2023-10-07
發佈時間:07:00 2023-10-07

《中年好聲音260強參賽者向展鵬(Jeffrey),因爸爸向華榮是向華強及已故向華勝的4哥,家族背景加上本身是保險界猛人,一曝光即被網民瘋狂起底甚至攻擊,信佛的他早已習慣閒言「你話我又唔會死」,但同時搞笑澄清年薪絕非傳聞的過千萬「起碼都一個double」。年青時青靚白淨的他,曾獲向華勝安排拍電影《十兄弟》,但他嫌造型醜,臨時翹起阿叔,認真大膽!採訪:杜杜 攝影:Stanley 髮型:@hairduo_hk Billy Cheong 化妝:Claudia

Jeffrey在私人會所,身穿價值數10萬的鴕鳥皮褸訪問,相當貴氣。
Jeffrey在私人會所,身穿價值數10萬的鴕鳥皮褸訪問,相當貴氣。
父母愛低調,Jeffrey出Po都唔會見到父母正面。
父母愛低調,Jeffrey出Po都唔會見到父母正面。

 54歲的Jeffrey,當年完成英國大學的工商管理課程返港,一心想入行當歌手,但向來低調的父母不太贊成跟他約法三章,「畀兩年我,一定要出到碟,出唔到就唔該唔好發明星夢,正正式式搵份工嘞!」當時他差點跟幾間唱片公司簽約,「爸爸識葉志銘(葉玉卿哥哥),我入過飛圖一段時間,準備簽約。」之後亦有接觸過華星和BMG,經理人就有小美和他契叔許願,但全部都是無疾而終。

Jeffrey行街時獲星探發掘,做過兼職模特兒。
Jeffrey行街時獲星探發掘,做過兼職模特兒。

偶像派拒演「遁地八」

1995Jeffrey在叔叔向華勝的幫忙下,終有機會拍電影《十兄弟》(鍾鎮濤和張敏主演) ,「我想唱主題曲,冇諗住做『遁地八』,佢就話『你可以雙線發展,拍吓先攞個機會』。」但造型令他卻步,「導演李力持一定要我戴個好似林亞珍嘅圓眼鏡,好厚有好多白色圈,我要唱歌個形象好緊要,係偶像派!」但他跟阿叔反映都冇用,「阿叔同佢拗,佢都係堅持,但畀我最後個鏡頭可以除眼鏡,我心諗『你玩我咩』,於是臨出發我話唔拍,都搞到幾麻煩,阿叔即搵第2個人做囉!」最終「遁地八」由宋本中飾演。

 

Jeffrey年青時外形不俗,難怪發明星夢。
Jeffrey年青時外形不俗,難怪發明星夢。
Jeffrey跟已故叔叔向華勝關係密切,仍不時到北京探望嬸嬸。
Jeffrey跟已故叔叔向華勝關係密切,仍不時到北京探望嬸嬸。

跟父母約定時限屆滿,Jeffrey歌手夢醒睇報紙搵工,面試時才知是保險公司,本來家人反對他做,但他聽完介紹覺得好適合,「保險係多努多得,學無前後達者為先,勤力啲叻啲就可以爬人頭,又可以良性競爭,1000個實習生有能力,1000個都可以升晒經理,嘩!乜個世界有啲咁好嘅工㗎咩,我仲要求第2日即刻返工,就做咗20幾年。」已是資深區域總監的他,在保險界獲獎無數,有指年薪過千萬,他就笑着話:「唔止咁少,我𠵱家要澄清,起碼都一個double,總之冇1000萬咁少,唔會係單數囉!」

生活富貴的Jeffrey,做了多年馬主。
生活富貴的Jeffrey,做了多年馬主。

做保險聽盡閒言閒語

Jeffrey燃起放低20多年的歌手夢全因要參加保險業的慈善歌唱比賽,經老友梁思浩介紹認識歌唱老師,「佢哋聽咗我唱歌,問我點解唔參加《好聲音》,可能嗰晚飲咗啲酒,就聽佢哋講報咗,又入到100強,好多嘢都係推出嚟。」參賽目標是攞第1的他,現在每星期上3堂,每堂4小時學唱歌,日日跑步吊聲練氣,更推掉所有飯局,「我9月生日,跟同事關係好好,每年食生日飯食4個月,今年同佢哋講咗唔食,我要減肥。」

多得老友梁思浩鼓勵,Jeffrey才決心參加《好聲音2》。
多得老友梁思浩鼓勵,Jeffrey才決心參加《好聲音2》。

入圍後即被起底的Jeffrey,完全感受到黑粉的威力,「思浩話我聽,啲人放我啲嘢上連登攻擊我,攻擊性都好犀利,又講我姓向,話我係咩社會,又話我買通晒,好多粗口係咁鬧,好似後尾連登admin做咗嘢,第2日同事上去睇冇晒。」不過他早有心理準備面對壓力,因家庭背景,做保險多年仍不時被攻擊,「做保險頭1個月就攞第1,做咗8個月全東南亞第2名,咁多年都係頭10名,全公司我攞過2次第1,做得好就會有人唔抵得你,都話咗20幾年。」

從事保險業20多年,Jeffrey獲獎無數。
從事保險業20多年,Jeffrey獲獎無數。

Jeffrey最嬲這些攻擊詆譭他的家族,還抹殺了多年努力,「『佢屋企大把錢,姓向㗎嘛,佢個阿叔跛㗎嘛,買1張單都夠佢幾年』,其實全部阿叔都冇同我買保險,我做咗咁多年唔多過5個親戚同我買,最大嗰張保單都係13萬港元1年,其他嗰啲係13萬,唔會幫我成功到,但係攻擊我嘅人就有好多。」他最估不到同事講得更狠,「『你尖沙咀好惡㗎喎!幾時請食飯,你食飯都唔使畀錢㗎啦!你唔好再呃屋企,你肯定係阿爸阿媽幫你買,你呢啲大少爺鬼做到呢啲生意咩,你呢啲人玩12年就唔玩啦!』」面對這些惡言,全家信佛的他早已看開,「你話我又唔會死嘅,如果你咒得我死,我死咗好耐啦,哈哈!我屋企個個都係信佛,好信因果,我媽咪話有啲叫做口業,批評人攻擊人係犯咗口業,要自己承受返。」

 

去年,Jeffrey獲頒「資深區域總監—傑出表現大獎」。
去年,Jeffrey獲頒「資深區域總監—傑出表現大獎」。

《星島頭條》新網站有更多精彩內容:http://www.stheadline.com/