星8卦｜「學霸」背景乾淨入豪門 EQ高笑對小三力保阿太位置

更新時間：11:00 2023-09-26
發佈時間：11:00 2023-09-26

做闊太係咪真係好幸福？有錢生活無憂但唔忿氣加寂寞，似乎係抑鬱症嘅成因。「學霸」讀書叻，家境正常，可以話係乾乾淨淨，除咗入行時同「哥仔」拍過一次拖，簡直可以話係俗流中嘅清泉。「老爺」好早就睇中呢個女仔，搵人明查暗訪，於是安排機會畀「太子」見面，仲講明佢出面所有女人一定入唔到宮，做自己新抱一定要背景乾淨。又係嘅，「太子」非常雜食，仲要係啲唔正經女人，佢又好負責任咁搞過就養一世。

「學霸」有個勢利阿媽，如何捕獲「太子」都係依循佢嘅方法一步步成功，所以「學霸」成為城中最令人羨慕嘅女人。事實呢，結婚後即刻做咗生仔機器，「學霸」都明白咁樣至令自己地位鞏固，但耐唔耐就會收到一啲奇怪留言，喺邊間酒店幾多號房有嘢睇。有阿媽教路，「學霸」梗係不動聲色，因為大把女人爭住坐自己呢個位，初時都有搵人去睇吓乜事，一次之後了然在心，從此就唔再有乜反應，繼續扮上流社會上流人，仲要喺「太子」心目中大方得體，已經決定點都唔放開呢頭家。

總之表面幸福，只要洗吓自己腦，肯定自己地位100年不變，出面啲女人繼續幻想無法子㗎，「學霸」EQ之高，簡直是女人典範！