「蝦仔」賈思樂與盧海鵬羅蘭激罕合體 當年遭爹哋整蠱得林建明幫手報仇
發佈時間：09:00 2023-07-07
70年代歌手賈思樂除發展歌唱事業外，亦曾經參與TVB《歡樂今宵》的演出，當年他與盧海鵬合演趣劇《蝦仔爹哋》產生強大化學作用，盧海鵬經常爆肚，將對手殺個措手不及，再加上一句又一句的押韻對白，實在令觀眾捧腹大笑！日前賈思樂在社交平台貼上與「爹哋」盧海鵬和「媽咪」羅蘭的相片，勾起了不少那些年的回憶！
【相關閱讀】：81歲盧海鵬通波仔後養生愛慢跑 約夏雨去南生圍精神極好雙手揈揈
【點擊睇《蝦仔爹哋》激罕合體】：
《蝦仔爹哋》是《歡樂今宵》中最長壽的短劇，劇集在1983年播出，一播便播了九年，後來被列入健力士世界紀錄大全最長壽短劇。2011年，他們合體演出完《蝦仔爹哋》舞台版後，甚少再見到他們合體，好拍檔難得聚會，大家都笑得相當開心，賈思樂亦忍不住留言：「我最敬愛最尊敬的兩位偶像—羅蘭和盧海鵬共進午餐。 請大家確實照顧好自己，讓我們很快再次遇上！」今年已經68歲的賈思樂，站在「爹哋、媽咪」身邊，依然保持住一貫的童顏，不少網民留言稱很懷念這對組合，但原來當時賈思樂有份演這套趣劇，是有一段故！
已經視為家人
賈思樂曾在訪問上表示：「一個鬼仔又唔識中文字，點樣做live show節目呢？但監製又畀我做，結果唔經唔覺就做咗10年，我自己都覺好奇怪。」 他還說當時對着鵬哥，真的有點驚：「鵬哥最鍾意搞我，明知我中文唔好，成日爆肚，搞到我唔記得啲稿，我接唔住啲對白佢就開心，見我就嚟浸死，又救番我上嚟，啲觀眾就最鍾意睇呢啲。」賈思樂還稱當了盧海鵬和羅蘭是親父母：「合作咗咁耐，真係當咗佢哋係家人，以前喺電視城晚晚都食完飯先開廠，就算而家唔係成日見，但係一見面就會有種特別開心嘅感覺。」
賈思樂又曾經在鄧英敏的節目上提到起初不喜歡與鵬哥合作：「我係天秤座，出鏡前要將頭髮梳好，啲衫又要熨得好整齊，我唔呃你，搞個頭至少要45分鐘，只要好滿意就有信心出鏡，點知鵬哥最鍾意捉到我呢啲位，搞我啲頭髮，又整皺我件衫，睇番playback，覺得自己好醜樣，我好嬲，不過我唔係好識同佢溝通，我惟有忍住，之後劇情加咗我外母林建明『大白鯊』，睇得出佢（鵬哥）成日恰呢個新人喎，我外母咪要維持秩序，對付鵬哥，鵬哥又唔敢搞佢吖嘛！所以一有『大姐明』出現，我就好開心，終於有人幫我報仇雪恨！」
後來賈思樂終於向盧海鵬「表白」清楚：「我同佢講『鵬哥，我哋都合作咗咁多年，你唔好再搞我個頭，好唔好呀？』跟住佢話『睇吓到時點喇！』不過久唔久都會玩，但係次數唔多喇，佢知我唔鍾意，但又唔會收手。」
【相關閱讀】：
22年前《歡樂金宵》趣劇重現 胡楓著西裝69歲零老態似30歲 黃泆潼劉曉彤淡出已成人妻
林建明一識盧海鵬就係拍床戲 黐到實被寸爆：乜嘢都冇睇鬼到呀！
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
