獨家丨MIRROR分拆開Show 柳應廷打頭陣盧瀚霆緊接姜濤壓軸

更新時間：09:00 2023-04-26
發佈時間：09:00 2023-04-26

MIRROR去年7月首度登上紅館舉行12場演唱會，不幸於第4場發生嚴重意外令舞者阿MO重傷，餘下演唱會被迫腰斬。相隔10個月，鏡仔早已走出傷痛努力工作，雖然有傳通關後出現脫粉潮，但每次鏡仔出活動依然萬人空巷，忠粉Still Here。《頭條日報》收到獨家消息，柳應廷(Jer)、盧瀚霆(Anson Lo)及姜濤將分別於今年各自舉行演唱會，之後就跟鏡仔合體開Show，鏡粉們，辛苦晒。撰文:方騫平

自年初《叱咤》開始，MIRROR負評不絕，對於MIRROR是否好運已完，隊長Lokman曾於本報訪問中直言，「啲運會轉㗎嘛！成日講八運轉九運啦！冇可能永遠係咁。」更笑言叫大家放長雙眼等睇佢哋谷底反彈，自嘲身處谷底，楊隊長認真識講笑。12子唔單止冇沉過，仲歌影視三棲愈發愈大，音樂頒獎禮有MIRROR，連電影頒獎禮都一樣見到佢哋。

鏡粉要儲定錢
年初一直有傳MIRROR會開Show，本報收到獨家消息，7月至8月，柳應廷、盧瀚霆及姜濤分別開演唱會，由Jer打頭陣，AL緊接，姜濤壓軸，知情人士透露，「姜濤演唱會暫定開2至3場，場地喺亞博，5月初會公佈詳請。姜濤𠵱家忙拍新片《12怪盜》及客串《盜月者》，5月14日同Anson Lo、柳應廷及呂爵安去大馬做Show，返港後會閉關為個唱做準備。」另外，MIRROR演唱會據知亦會於今年舉行，去年選擇唔退飛的觀眾今年絡於有Show睇。