港聞

娛樂

最Hit

即時

中國

國際

星島申訴王

財經

地產

生活

健康

教育

體育

專欄

馬經

【頭條獨家】結婚7年痴漢Feel甜望老婆食雪糕直擊陳豪陳茵媺初戀式拍拖

即時娛樂

更新時間：22:42 2020-07-02 HKT
發佈時間：23:30 2020-07-01 HKT

陳豪搭住Aimee膊頭，不時望住老婆食雪糕，其間女方發現記者捕捉其食相時即瘋狂爆笑。

49歲的陳豪（阿Mo）啱啱拍完《陀槍師姐2020》，之後又緊接連開兩套劇，出名「愛妻號」嘅佢趁放假當然要陪吓一直盡心盡力為屋企嘅老婆。上周一（22日），難得仔女復課，雙眼冇乜神的阿Mo拖住老婆陳茵媺（Aimee）去中環拍拖，雖然結婚7年又有三個小朋友，但兩人仍似熱戀情侶一樣，Sweet爆拖手又搭膊頭，沿途阿Mo不時喺Aimee耳邊俏俏話𠱁對方開心，仲不停如痴漢般甜望老婆食雪糕，完全初戀Feel拍拖，得意又好笑。採訪：張詠森

在商討下一個目的地時，阿Mo全程拖實老婆隻手，又幫手拎手袋。

結婚7年的阿Mo和Aimee一直是圈中公認的「模範夫妻」。

陳豪近排好忙，上周才拍畢《陀槍師姐2020》，轉頭又要為本周一首播的新劇《殺手》密密做宣傳，接住再開拍邵氏劇集《飛虎3之壯志英雄》，不過就算劇接劇，永遠家庭第一的阿Mo幾攰都會「唧」時間陪老婆仔女，好似剛過去的父親節，他便於開工前同一家人去公園放電，非常溫馨。難得小朋友返晒學，上周一兩公婆就去中環IFC拍拖，享受二人世界！

陪食陪買
當日下午4時許，記者發現戴上口罩、穿便服的陳氏夫婦企喺電梯口吹水，Aimee孭住大袋Gucci戰利品，估計已經同老公Shopping完，而其橙色Hermes手袋就按「慣例」由阿Mo拎住。未知是否意猶未盡唔捨得返歸，兩人討論完一輪後，又手拖手上咗3樓買Frozen Yogurt食，以為一杯雪糕兩份分，原來是Aimee獨食，可能知道老婆鍾意食甜品，所以阿Mo讓對方一個人享受，自己就喺側邊望住Aimee慢慢嗒，看他雙眼笑瞇瞇，濃濃痴漢Feel咁睇住老婆食都咁開心。

孭住大袋Gucci戰利品的Aimee，最後上樓買埋乳酪雪糕先走。

見Aimee捧住杯雪糕笑晒，阿Mo都好開心。

調皮茵媺
而暫時卸下「媽媽」身分的Aimee，在老公面前亦顯得特別調皮，當發現記者在場時，她即擰轉面「偷食」並笑謂：「唔畀你影我食雪糕個樣。」記者即識做行開，阿Mo就Sweet爆搭實老婆膊頭，雙雙行去停車場攞車；後來不知是否老公提水？離遠見到鏡頭捕捉她的為食樣時，Aimee就再次戴番口罩，又忍唔住「岳」高頭大笑，誇張得連途人都忍唔住回頭望。兩公婆全程都大方任影，臨走前仲同記者揮手道別，近距離見到阿Mo雙眼現紅筋，問他是否好攰？他說：「呢排開工呀，好長時間，每日瞓得幾個鐘咋。」唔夠瞓都犧牲睡眠時間陪老婆行街，呢啲老公真抵錫！