胡慧沖 - 泰國四面神竟腳踩南瓜？ | 筆泰沖動

更新時間：02:00 2026-11-06 HKT
發佈時間：02:00 2026-11-06 HKT

　　非常多謝泰國政府旅遊局邀請，日前有機會去到曼谷以北嘅Sing Buri（信武里府），參加當地一年一度四面神祭典，真係令我大開眼界！

　　當晚場面十分壯觀，除咗宗教儀式，仲有大型歌舞、精彩舞台劇同煙花表演，現場氣氛非常熱鬧！而最吸引我嘅，當然係當地呢尊據稱全球最大嘅金屬鑄造四面神像！不過大家有冇發現，呢尊四面神同其他唔同，竟然係腳踩南瓜！

　　相傳四面神降臨人間時，神力強大，雙腳不能直接接觸大地，因此有腳踏植物果實嘅傳說。但原來背後仲有更實際嘅意義！呢尊神像由當地高僧龍婆Charan興建，希望透過南瓜，突出信武里府嘅農業特色。事源當地盛產南瓜，以前農民賣畀收購商，每公斤只得約6泰銖；後來透過神殿直接賣畀遊客，價格可以提高至18至20泰銖，因而幫助農民增加收入。

　　而南瓜泰文叫「Fak Thong」，當中「Thong」即係黃金，寓意財富同好運。最有意思嘅係，大家可以直接喺神殿附近攤檔購買南瓜拜四面神，拜完之後將南瓜帶返屋企煮嚟食，寓意將福氣同財運帶返屋企！

　　如果唔想帶走，亦可以將南瓜留喺原地，當地會安排轉贈畀有需要人士，包括用作學生午餐食材，真正做到拜神祈福之餘，又可以幫助農民同有需要嘅人，一舉兩得！當地亦鼓勵學生參與清潔神殿等社區服務，培養責任感。

　　一個南瓜，竟然將宗教信仰、農業經濟、慈善同教育連繫起來！呢種有意義嘅地方文化，真係值得大家認識。如果你有興趣親身參觀，由曼谷出發最方便就係包車，車程大約兩個鐘，視乎交通情況而定。值得安排半日甚至一日時間，感受一下曼谷以外嘅泰國風情！

胡慧沖