Cally - 開幕嘉年華圓滿落幕「香港博物館節」 11月60+活動接力登場 | 商界講呢啲

更新時間：02:00 2026-11-04 HKT
發佈時間：02:00 2026-11-04 HKT

　　上周末，大家去咗邊度玩呢？Cally就去咗尖沙咀文化中心露天廣場，湊熱鬧參加咗「香港博物館節2026」嘅頭炮活動——「繽Fun博物館嘉年華」。現場真係人頭湧湧！一家大細放電又有，文青打卡又有，氣氛超正。

　　今年嘉年華主題係「拼貼今昔，香港故事」。Cally一入場，雙眼即刻被三大巨型打卡位俘虜。首先有重塑昔日街坊風味嘅「格仔茶檔」，坐低影相勁有懷舊feel。行過少少係「香江藥號」。百子櫃前，大家爭住體驗親手「執藥」，夠晒過癮。最驚喜一定係「Happy Fortune遊樂場」神還原舊式掟銀仔攤位！掟中的話，仲有專屬籤文俾你睇運勢。好玩之餘，集體回憶返晒嚟！

　　嘉年華又點少得免費手作？今次五大懷舊工作坊誠意爆燈。Cally技癢，親自試玩「菠蘿包黏土」同「布藝拼貼旗袍掛飾」製作。估唔到出嚟件成品精緻又得意。同場仲有「涼茶牌鎖匙扣製作」、「大押招牌彩繪」，以及極具環保意義嘅「月餅盒升級再造工作坊」等。大人細路都聚精會神發揮小宇宙，場面溫馨又熱鬧。

　　兩日嘅嘉年華雖然已經圓滿結束，錯過咗嘅朋友唔使失望！事關「香港博物館節」貫穿整個11月，康文署轄下各博物館及藝術空間將接力推出「特選節目」、「文化聯乘」、「同樂日」、「展覽及電影」以及「互動體驗」五大系列，合共60多項精彩活動等你參加。今年博物館節亦是第六屆港澳大灣區文化藝術節響應節目，節目咁豐富，大家唔好錯過啦！