陳敏之帶囝囝親子跑自爆曾患抑鬱籲正向面對 胡定欣、張馳豪齊出戰港珠澳大橋半馬
發佈時間:18:17 2026-11-16 HKT
港珠澳大橋(香港段)半馬拉松昨早(15日)舉行,一眾藝人落場跑步兼做善事。胡定欣、陳山聰、張馳豪、黃庭鋒及曾錦燊出戰「中銀港珠澳半馬2公里榮譽盃」;陳敏之則帶同兒子雷子樂參加「親子MAX Fun一起跑」,母子檔上陣畫面溫馨。

陳敏之帶囝囝跑親子賽 自爆曾患抑鬱
陳敏之透露本想挑戰2公里榮譽盃,但因兒子年齡未夠,只能參加親子跑,笑言會考慮明年拉埋老公一齊跑。提到伍詠薇日前在網台節目自揭曾患抑鬱症,陳敏之坦言自己亦有過抑鬱:「其實抑鬱病好多都市人都會有,我自己都有過。我媽咪差唔多兩三年前離開咗我,嗰段時間我都有抑鬱。我唔覺得係一個要避開嘅話題,反而係要share我點樣而家好返。」

她透露當時有與伍詠薇丈夫練海棠保持聯絡,亦有在背後默默關心對方,惟自己亦分身不暇:「嗰時我媽媽走咗,又要照顧小朋友,真心講,我連自己都搞唔掂。你問我係咪唔夠關心佢?可能係,但當時我自己都好需要人關心,我相信如果係真正嘅屋企人,應該唔會介意。」她認為情緒病並非忌諱,伍詠薇能公開談論足見已痊癒,呼籲大家不用擔心。
胡定欣摸黑出戰 靠陳山聰帶領完成賽事
胡定欣昨早化身陳山聰「背後的女人」。她原打算邊跑邊打卡,惟上橋後發現「天都未光」,幸得山聰帶領下順利完成。山聰笑言:「我仲有幫佢影相!成績滿意,天氣都舒服。上年去過上海跑半馬,日本又去過,我覺得定欣都可以試試。」
對於伍詠薇自揭抑鬱,陳山聰表示一直有關心對方:「咁一定有關心佢。如果患情緒病,可能佢又唔識點同人講;而家佢願意分享,即係冇事。近排我同佢做嘢,佢都好開朗、好開心,變返以前大家識嘅伍姑娘。」
黃庭鋒被網民叫醒 張馳豪靠「急」奪亞軍
同場出戰2K的尚有黃庭鋒、曾錦燊及勇奪亞軍的張馳豪(Aska)。黃庭鋒笑言賽前在社交網貼出凌晨3點鬧鐘截圖,結果鬧鐘未響已被熱心網民瘋狂叫醒,令他哭笑不得。他坦言近期忙於無綫台慶綵排,無暇練跑,並劇透台慶序幕將有80人(40男40女)大型共舞環節:「好多人,如果自己一個跳得唔好就好顯眼,所以大家都好努力練舞。」曾錦燊亦笑言不少《東張西望》女主持忙於練舞及練跑,自己要瘋狂「頂更」,同樣零訓練上陣。
張馳豪勇奪2K榮譽盃亞軍,除歸功近期為Hyrox賽事操練體能外,他笑言全靠一個「生理原因」:「因為終點先有廁所,一路跑一路諗住快啲去廁所!」結果成功衝線奪亞。

















