最新「人情公價」掀議!自爆封「呢個數」新娘嫌少 過來人當場即做一步霸氣反擊|Juicy叮
發佈時間:08:02 2026-11-17 HKT
有網民在Facebook發文求教,指自己「幾十年冇去過婚宴,想請教而家咩價位??」,更老實自爆「我仲停留係酒店800,酒樓500既年代」。與此同時,樓主亦停留在昔日買銀行禮券做人情的習慣,好奇發問:「另外銀行買禮券要寫收款人嗎?我以前好似係隨便人執到都可以去攞錢」,帖文一出引起大批網民熱議。
停留在「恐龍年代」?網民更新最新人情行情
對於樓主「酒樓500、酒店800」的記憶,不少網民笑言樓主脫節太久,甚至有人打趣反問:「點解會幾十年冇去過,絕對唔合理,一係坐左幾十年監,一係昏迷幾十年最近蘇醒。」、「你都係恐龍年代,廿幾年前如果去得飲嘅話起碼都1000落樓」。有網民亦建議樓主「你問得嚟去問ai仲快啦」,惟樓主無奈回應:「我唔識啊」。
談到現時的實際行情,大批熱心網民紛紛報價,較為主流的意見認為現時「酒樓800至1千」、「酒店1000至1500」,或者「1200好似係基本,我Frd 啲就比1500,好Frd 就1800囉...」。不過亦有網民提出更高門檻,直言「如果去,酒樓$1000以上,酒店$2000, 否則隨時反面收埸。」、「酒樓1500,酒店2500」,甚至有網民語出驚人表示「我一向都比5000,但如果唔去就1蚊都唔比。」、「俾得起就封$5,000人情,我也曾收過,可證記足一世。」
如果決定不出席婚宴,人情又該如何計算?有網民提問「唔去俾幾多?」,不少網民認為「唔去真係唔使比,網上寫300」、「包500禮到不去飲!」,亦有精明網民抱持「俾$300,唔出席。俾成千蚊1個人,我自己去食好D好過啦!(註:親戚除外)」的心態。
「請飲」變「夾錢食飯」?按圍數成本計人情引爆罵戰
在討論人情銀碼的過程中,有網民提出一套「成本計算論」,建議「最直接,打去擺酒地點問結婚一抬價錢和人數,例如$6000,一抬坐12人=$500 per head」,有網民更補充「重未計主家带既酒水喎老細!咁搞法人地蝕水呀!」、「佔位係度食嘅,俾番一圍成本除人數好合理,理得你食唔食、食幾多」。
不過,這種「計數論」即激起大批網民反彈,質疑香港婚宴文化已經變質,有網民批評:「唔洗俾錢先叫請,要俾錢係叫做夾錢食飯......明白無?」、「其實咁多年都唔明,為什麼賓客抽空恭賀已很比面及費時,話明係人家請飲,為何出席要夾錢?如果真心有誠意請客到賀贈興,應該豪氣要求不用封錢出席!」。
不少網民更炮轟部分新人擺酒卻指望賓客埋單的心態:「未聽過擺酒係expect一毛錢都唔洗出,係等人做禮黎埋單嘅喎」、「咩叫蝕水?如果唔想出錢但又要大排筵席的新人,咁幫唔到你」、「一直都係睇交情,唔係睇係邊度擺,唔會因為個酒席幾錢而決定人情,咁樣同夾錢食蛇宴有咩分別?佢哋擺之前又唔問吓我夠唔夠錢嚟夾錢飲?」。
有網民更反問:「其實佢幾錢圍關我咩事?有同事試過去Musea酒店飲十幾萬一圍唔通你封一萬銀?」、「咁仲有其他各樣雜費開支都要成本嘅,不如直接賣門票明碼實價啦,做生意應該係咁」。
封800元隨時被公審?過來人呻主人家「詐型」
給多少人情除了關乎荷包,更隨時考驗人性與友情,有堅持封500元的網民直言:「其實俾咁多重大人個口!攪到個個去酒店擺!」、「你係請人,唔係做生意!500已好俾面,唔係白食佢!」、「一律500港元,反面仲好,500睇清一個人,抵到爛」。
不過,給「舊價」隨時要面對被嫌棄的風險,有網民提醒「通常800,之後被網上公審,至於幾多先會得到讚賞就未見過」。
新娘嫌人情少 「我叫佢俾返人情我,我走唔食啦」
有不少苦主更分享親身經歷,有網民指「見有人酒店宴會,封1OOO都被女主人乍形。」,另一網民亦附和「十年前我咪比人乍型講緊十年前1千」。更有網民憶述霸氣反擊的經歷:「十幾年前鄰居嫁女,在小酒家擺酒,我封了$700,仲俾新娘子話封得太少,我叫佢俾返人情我,我走唔食啦~佢的酒席係4千一圍,我除返12個人嚟封禮俾佢,已經賺到笑啦,面係人哋畀,架係自己丟」。
面對俗套的禮金文化與動輒上千元的開支,不少網民選擇對不熟絡的「紅色炸彈」敬而遠之,直言「有啲新人只求充場面根本唔理人想唔想去,呢啲叫做打秋風」、「今時今日如有人結婚而無請你去飮,先至係你老朋!」。甚至有搞笑網民重提經典電影橋段及幽默應對法,笑稱「化骨龍都係攝報紙咋,佢話唔會有人知」、「全晚刺激高潮節目~即埸拆人情」,有網民更打趣建議緊貼電子支付潮流:「Zip個支付寶code入去等主人家自己㩒銀碼」。
買銀行禮券已成歷史?網民力勸:用現金最實際
至於樓主在帖文中問及的「銀行禮券」問題,亦引來一番討論,有網民急忙勸阻:「千祈唔好買禮券,真係會煩到收禮人」、「禮券要手續費呀,老人家買都要,咪嘥錢嘥排隊時間。」
一名女網民更分享尷尬經歷,表示「千祈唔係唔好買禮券」,指自己在某間銀行買,結果收禮的人竟表示沒有該銀行戶口,「說入不到」,她更懷疑「不過我唔肯定係咪Z世代以為係支票」,才出現結果佢再入番(同一間銀)另一個人戶口(就得)」、「我不清楚佢是否將禮卷放入入票機」。樓主見狀亦忍不住疑惑回應:「但支票都可以任何銀行入落自己戶口」。
其他網民則紛紛解答指「基本常識,銀行禮卷=銀行本票=現金支票。」、「禮卷是銀行出的現金票,所有銀行都入到」。不過為免除後輩不懂處理或排隊入票的麻煩,一眾網民最終都建議樓主直接封現金或者用PayMe、Alipay等電子支付,「如果同等價值,個人覺得現金比較好或者再加張賀卡,禮劵未必每個人啱用」、「最少金牛一張入大紅包唔摺佢可以」,既大方又省卻雙方的煩惱。
來源:似水流年@facebook
延伸閱讀:港情侶「火鍋放題店」擺酒 派唐記包點飯券當餅卡 出席者爆人情須「呢個價」

















