港女不滿侍應揖揖揚揚 公審一路食一路密集式收碟 網民力數餐廳趕客3大陰招｜Juicy叮
發佈時間：11:25 2026-10-24 HKT
外出用膳最怕貼錢買難受。店家「一邊食一邊密集式收碟」的做法，近日被顧客在網上公審，不滿侍應揖揖揚揚阻住晒。網民亦趁機力數餐廳趕客3大陰招；對此，有前線員工大吐苦水，解釋唔收吉碟會被老細視作懶懶閒，道盡餐飲業兩難。詳情見下圖及下文：
港女不滿侍應揖揖揚揚 公審一路食一路密集式收碟 網民力數餐廳趕客3大陰招逐張睇↓↓↓↓
公審密集式收碟 一路食飯一路執碟體驗差
樓主前天（22日）在社交平台 Threads發帖，表明不喜歡「一路食飯，啲人一路喺度執碟」，有時甚至還要主動「幫佢哋遞埋碟」。
她不滿地稱：「大佬好心你，你執碟執嗰幾隻大就算啦，剩低嗰啲細囈嘢可唔可以等我走咗之後先執呢？」直言這種體驗真係好差。
樓主認為，自己來光顧根本沒理由要「方便佢執碗」，斥責要求食客遞碟的做法簡直是「本末倒置，應該係佢唔阻礙我呀」。她建議侍應只執大碟，不要執太近客人的碗碟，就不會顯得揖揖揚揚。樓主更透露，最慘是未食完都照執：「有個阿姐我食到半路都想執咗我，我一手閘住佢！」
網民：特登剩幾粒飯菜作防線
有網民共鳴指，為免太快被清碟，有時會「特登剩幾粒飯、幾條菜喺隻碟度」作防線。
不少顧客大嘆，與朋友「傾緊計」時侍應突然走過來一直執，打斷話題「阻住晒」。有網民直言，未食完就收碟做法無禮，客人應該直接投訴。
樓主則強調，若餐廳忙碌外面等位，她絕對會自動自覺結帳走人，但在座時請侍應不要騷擾，這是「互相尊重」。
網民力數餐廳趕客3大陰招
針對這種趕客式服務，網民憤怒盤點在港遇過的餐廳趕客3大陰招：
第一招：隔壁桌用漂白水拖地及掃地
有顧客憤怒分享，自己明明還在一邊用餐，店員卻已經在隔壁空檯用濃烈、刺鼻的「漂白水拖地」逼人走。另有網民直言，同樣極討厭一路吃飯，阿姐一路在周圍掃地，導致「周圍塵」。
第二招：筷子刮檯敲碗筷
有網民遇過極粗魯的侍應，直接用筷子在檯面上「刮走」食剩的飯餸，中途更一邊用筷子哼打碗筷邊，在顧客耳邊製造噪音。
第三招：眼神盯防兼「秒搶」餐具
有網聯形容，最難受是侍應不停返轉頭，企在旁邊盯著還有甚麼未食完，一見放低餐具就「秒搶走佢」。網民指出，這種密集收碟目標明確，就是在暗示客人：「你夠鐘埋單了、夠鐘交檯了、出面好多人等緊位、我哋就收工喇！」
前線吐苦水：唔收即係唔做嘢懶懶閒
面對顧客的投訴，多名任職餐飲業的前線網民現身大吐苦水，直言「你估好想收咩，唔做又畀老闆鬧，以後講聲『老闆叫㗎』，打工啫」。
前線解釋，不斷收拾其實是害怕被指責偷懶：「除咗職責上一定要收吉碟，成檯都係吉碟都唔收，咪即係我哋唔做嘢懶懶閒。況且，唔收係會被老細鬧㗎！」
亦有同行坦言前線夾在中間左右做人難，侍應若毫無動作，在老細眼裏就等同於「發夢」。有網民對此表示理解，認為不應刁難前線。
也有網民調侃，想要特別服務，埋單時放低50至100蚊貼士即可。樓主亦深表體諒，笑言若老細「乍型」，侍應可以直接回覆是「個客唔畀執」來擋駕。
資料來源：meltingsuss＠Threads
相關閱讀：
不小心倒瀉飲品弄污衫鞋 上環茶記侍應疑被逼私賠食客$780？目擊者：已道歉免單仍被食客吵罵成個鐘 大律師咁睇
旺角酒樓阿姐圍攻港女屈走數？！被指毒舌招呼句句有骨 事主嬲爆呼冤：我都係第一次嚟！
