你亂潑水我執靚B｜曾智華
發佈時間：10:40 2026-10-26 HKT
上周N咁多驚青股友急call，話嚇到腳軟，因恒指跌破23000點，問應否跟沽，以免血本無歸。呢類人，根本唔應該買股票，因為傻吓傻吓！
首先，大家要知香港股市點解跌（內地股市也如是），乃因阿爺追數，唔還番過往多年欠下稅款就殺無赦，話知你知名度幾高。
舉腳支持阿爺追數
原因？當然是阿爺水乾，要吸返應吸的水。呢下舉腳支持，因班內地大孖沙多年來食盡中國經濟起飛free ride（順風車），賺下天文數字金錢，不少靜靜雞運晒出外，當然亦有不少流咗落香港買物業及股票。
你以為阿爺傻的嗎，形勢好時，先隻眼開隻眼閉，但形勢逆轉，咁你班賺得肥到着唔到襪的巨富，仲唔嘔番不應袋晒的錢出嚟？喂，法例寫明大家要立稅㗎！
港股流動性大 富豪先沽為敬
幾個月前班富豪見死線未到，拖吓拖吓唔認真處理，結果，10月底殺埋身，再唔還錢俾阿爺，必定有好戲上演。咁點？嗱嗱聲鬥快「走」（走得就走）及「沽」（套現歸還稅款）囉。你沽佢又沽，會點？當然冧市，就咁簡單。
香港股市流動性大，套錢容易，不少內地富豪在此「先沽為敬」。沽乜？正是幾隻重磅內企股，尤其是騰訊（700） 、阿里巴巴（9988）及寧德時代（3750），於是，紛紛跌倒接近一年新低。
這個現象，有似英文著名諺語：Throw the baby out with the bathwater。意即，當一個人着急時，會失去理智，盲目地將一切捨棄清除，不論是好與壞，統統丟棄，這就是「將污水與BB倒掉」的不智行為。
逐一「收養」騰訊、阿里及寧德
放在經濟領域，若有人如此，咁冷靜、理性、客觀的投資者會點做？簡單，就是執「靚BB」，帶回家將佢養得肥肥白白，做個健康快樂有貢獻的人。
同一道理，騰訊、阿里及寧德時代，全屬有國家政策支持的大企業，未來也與國家戰略性發展息息相關，絕非甚麼「妖股」或蠱惑商人做大股東的集團。我的策略簡單，「靚BB」我會慢慢選擇性逐一「收養」。
資深傳媒人 曾智華
