銀債利息3800萬去向｜曾智華
發佈時間：11:46 2026-10-05 HKT
過去兩周本欄標題：（一）誰「偷走了」銀債利息？（二）冇個局敢答銀債利息問題！兩篇專欄在此見報後，我再放上自己擁有13萬追蹤者的社交平台，獲得空前的瀏覽率，執筆此刻已達355,606次。如此受到大家關注，金管局及財經事務及庫務局兩位最高負責人余偉文及許正宇，冇可能唔知。但點解拖咗接近兩星期，佢哋完全冇回應，搞到我等呀等等等！
好奇之下，走訪一位已退休的極高層官員，佢聽完，也百思不得其解。
「碌Sir，這是Public issue也是Public money，俾人白紙黑字公開質問而唔交代，相當不智，Why not come clean？幾千萬咁大筆數，冇可能偷偷袋咗喎！」
資金去向總應有公開交代
公眾的錢，去向總應有一個公開交代，不能就此消失於人間。你可以是提供俾你銀行作行政費，也是可以是撥入庫房，只要有理有據（加有權），冇人反對。
但如今，幾千萬不明不白失蹤，咁就每個傳媒監察者都有先天責任去追查，絕非多事。
過去兩周，日日都有各路人問：「碌Sir，有答案未？點解仍在拖？」
至今冇答案，不少網友及讀者怎會心甘？故希望小弟繼續施壓，包括擺埋上述兩個局的頂爺財政司司長陳茂波上枱，公開問佢知唔知單嘢，若唔知，咁就……奇嘞；若知，唔該挺身代答，做個問責司長。
有啲讀者更好笑：「碌Sir，不如去搵審計署或申訴專員公署吖，公家嘢，11年銀債利息總共幾億噃，天文數字呀！」
銀債，本質就是政府派錢益草根長者，協助佢哋鎖住流動資金，以免被各式合法或非法騙徒呃去，雖少少哋每人派12萬，可以每年穩穩陣陣收近四千幾利息，天大好事。
不過，如今揭出由申請到派發期間，申請者過數後的幾日，11年原來共有幾億元利息無端端失蹤，唔知去咗邊個個袋，咁就是絕大公共疑惑。
終於，截稿前收到官方來信（等咗11日！），指政府今次收咗3,800萬利息。終於公布了！
資深傳媒人 曾智華
