PJ嘴對嘴｜「一飯封神」名廚Eric主理 中環Arbor高性價比午餐 $688歎米芝蓮兩星滋味
發佈時間：09:00 2026-11-04 HKT
大家有冇睇《一飯封神2》？參賽廚師清一色係華人，偏偏有一位芬蘭籍廚師單槍匹馬參戰！最厲害係佢保持住零失敗紀錄直殺入Final！冇錯，佢就係Arbor嘅主廚Eric Räty！
高CP值神級菜式
大家都知Eric係行內出晒名嘅極致「I人」，當知道佢參加《一飯封神》時，真係感到既驚且喜。每星期定時追睇比賽，好開心見到Eric同內地及香港廚師打成一片，幾次於逆境中，Eric都能處變不驚帶領團隊獲勝，完美展現作為全場唯一「兩星米芝蓮大廚」嘅神級實力同領袖魅力。睇住Eric於節目將拿手好戲——招牌乳鴿、兔肉、龍蝦麵、腐皮甜品等逐一亮相，忍唔住訂位去食返個Lunch。
不得不讚，Arbor三道菜午餐咁多年來居然逆市中都冇加過價，依然係$688已可品嚐到兩款精緻吞拿魚餐前小食、外脆內軟嘅酸種麵包、超鮮嘅番茄北寄貝頭盤、乳鴿主菜，以及賣相極美嘅豆腐甜品。食完仲有極高水準、堪稱全港最好味經典貝殼蛋糕（Madeleine）配香濃咖啡或茶。
短短一頓午餐，由頭到尾盡見細節之高質。最後更有幸見到Chef Eric本尊，真係冇以前咁怕羞喎！影完相佢就急急腳返入廚房，果然喺佢心目中，最重視始終都係食物的味道，Respect！
來自北歐的他
這家位於中環的Arbor，港鐵站行5分鐘就到，揸車的話直接泊在食廈對面停車場，對兄弟們來講簡直是極速送達，非常方便。
食物方面阿J已經講過，就不重複了，反而想同大家講講來自北歐的Chef Eric。這位大廚的故事，簡直是一部男人的浪漫奮鬥史。
Eric本身在歐洲工作，是百分百紅褲子出身，真的是由洗碗工開始，一路做、一路學、一路奮鬥，硬生生刷盤子刷到成為大廚。
緣份這東西很奇妙，他在香港舉行的一場四手晚宴上，認識了同是甜品師的太太。當內斂的北歐廚師遇上心思細膩的亞洲甜品師，廚藝交流直接擦出愛火花，演變成夫唱婦隨的浪漫故事。兩人先是一起前往芬蘭生活與工作，之後再回香港打拼。
我們從Arbor開業便開始幫襯，見證住Eric由攞一星米芝蓮到兩星，在風光無限的頒獎台及鎂光燈下，他依舊是不折不扣的「愛妻號」。如閣下自問都係愛妻號，不妨帶老婆嚟食餐飯，同Eric交流一下「寵妻心得」！兄弟們，信我，疼老婆絕對是百利而無一害的頂級投資！
—————
Arbor
- 地址：中環皇后大道中80號H Queen's 25樓
—————
PJ Moments—以夫妻二人視覺去分享美食及旅遊經歷
