容祖兒啟德個唱加開兩場30分鐘售罄 五場一票難求 親自上網搶飛全軍覆沒
發佈時間:16:15 2026-11-18 HKT
容祖兒(Joey)《AURA 容祖兒演唱會》啟德演唱會熱潮停不了!早前三場門票開售後半小時火速售罄,大會隨即宣布加開2027年1月19及24日兩場,新增兩場今日中午12時公開發售,結果再度於30分鐘內全部售罄!五場啟德演唱會一票難求!
容祖兒借「蟹蟹」表達謝意
正身在南京工作的祖兒,收到再度爆滿的喜訊,開心又感動。今日早餐,同事叫了滿枱大閘蟹,笑言好意頭, 為她準備借「蟹蟹」(普通話諧音謝謝)多謝大家支持!祖兒表示:「真係好多謝大家嘅支持,有呢個成績真係好開心。但無論做幾多場,我哋嘅準備都係一樣咁重要,希望可以做一場好show畀大家睇!」
容祖兒冇諗過咁難搶飛
五場演唱會先後售罄,網上卻仍有大量歌迷留言大呻搶不到飛。祖兒今早決定親自落場,與工作人員一齊嘗試上網搶飛,結果全軍覆沒!祖兒說:「知道難搶,但冇諗過原來真係咁難!」五場全部爆滿,會否再有加場機會?祖兒坦言,暫時不會將心思放在加場問題上:「睇公司決定同大家嘅反應、feedback再研究啦。我覺得依家要做好嘅嘢,都唔係諗加唔加場,呢個比較被動。我要繼續砌好個rundown,踏實啲諗好啲內容。」
容祖兒榮升英皇娛樂董事歌迷搞笑留言
祖兒昨日正式榮升英皇娛樂董事,歌迷隨即搞笑留言:「第一次睇自己偶像開騷,亦都係第一次睇一個公司董事做演唱會!」令祖兒忍俊不禁。對於新身分,祖兒直言自己不懂處理生意上業務決策:「其實收到公司邀請,我當時諗,我點會識得處理業務上嘅決策?我只可以憑自己對呢個行業嘅熱愛同經驗,為自己、為公司旗下藝人提出意見,或者諗吓策劃同發展方向。」她更拿自己開玩笑:「我連演唱會揀歌都搞唔掂,斷捨離唔到!呢幾晚揀嚟揀去,揀到亂七八糟,所以大家想聽咩歌,最好留言畀我,同我一齊決策吓!」
容祖兒盼公司有人情味
雖然自認不擅長商業決策,但祖兒對娛樂公司的經營理念卻有自己的一套看法。她認為,一間娛樂公司不應只着眼於生意,更需要有人情味、同理心,以及對藝人的了解和尊重。既然楊博士邀請她加入董事局,她希望憑藉多年幕前經驗,為旗下藝人提供更多發展意見,亦讓他們有更大空間參與自己的事業規劃。她認為時代已經不同,藝人不應只被動接受安排,而是應該有更多機會表達想法,為自己的事業作出選擇。

















