向海嵐開腔護航HOY《你的保安李寶安》反駁曾志偉「放煙花」論：口碑緊要過數字

更新時間：18:00 2026-11-15 HKT
發佈時間：18:00 2026-11-15 HKT

HOY首部處境劇《你的保安李寶安》自開播以來話題不斷。在與 TVB 《愛·回家之三代同糖》正面交鋒下，該劇收視高開後回落。早前曾志偉受訪時調侃其收視走勢如「放煙花」，鄧兆尊亦公開批評劇本鬆散及場景單一。對此，有份參演的向海嵐日前開腔為劇集護航。

向海嵐豁達看淡收視

對於收視下跌及曾志偉的言論，向海嵐表現豁達。她坦言香港電視圈存在慣性收視，相比起數字，她更看重觀眾口碑與市場多樣性，並高興這次能打破過往的「奸妃」形象：「其實喺我自己拍嘅時候係好開心、好好笑，好期待。最開心係今次可以畀觀眾見到一個唔同嘅自己，以前大家記得嘅向海嵐可能係《無頭東宮》、《楊貴妃》，定型咗喺一個框框入面，今次電視劇同網上都睇到，可以畀更多人見到我嘅另一面。」向海嵐補充：「收視高就梗係開心，但睇番咁多年香港電視界，始終有慣性收視。我覺得收視唔係最重要，反而口碑好緊要。身邊朋友同網民都話多咗個選擇、多咗個節目睇，畀觀眾有唔同選擇係好事。」

向海嵐坦承開局資源有限

針對鄧兆尊批評劇本和場景問題，向海嵐坦承拍攝初期預算確實有限。她指出劇組由電影導演何爵天帶領，拍攝手法與傳統電視不同，團隊和觀眾都需要時間適應：「我相信佢哋最初開工嘅時候，預算真係唔多，所以可能諗一啲最簡單嘅方法去呈現故事。但到我拍嘅時候，由第一日到第二日已經見到好唔同，慢慢投放咗多啲資源落去。佢哋本身係拍電影嘅，用咗電影手法喺電視呈現，慣性睇開處境劇嘅朋友可能會覺得『咦，唔係平時睇開嗰種感覺喎』，成個團隊同觀眾都需要時間去磨合。」

向海嵐解釋實景質感與廠景不同

有網民比較兩台製作，向海嵐解釋《你的保安李寶安》是租用寫字樓改裝成保安室實景拍攝，質感與傳統廠景有別。她更笑言自己當初亦對偏暗的燈光感到好奇：「TVB嘅景可能仲係廠景，而家《李寶安》其實係實景嚟，真係將一間寫字樓改裝成保安室，感覺一定唔同。至於光線係咪要光燦燦定要氛圍，初初睇有一兩場戲我都有少少訝異：『咦，保安室放咗工呀？好似Office冇開燈咁！』但我覺得嗰個唔係最重要，最緊要都係劇情同內容。」