駱應鈞罕談無子原因 拒認出身書香世家：我好令爸爸失望 曾為大狀胞弟駱應淦戒酒

駱應鈞入行逾半世紀，曾演出《射鵰英雄傳》、《神鵰俠侶》及《壹號皇庭》等多部經典劇集，近年主力在內地工作，不時有網民分享其近照；雖然身形顯得清瘦，但精神依然相當不錯。回顧他在2019年初進行心臟檢查時發現有腎石，為免年紀漸長令病情惡化，先後接受兩次手術並住院40多日，休養四個月才完全康復，自此便逐漸減少幕前演出。除了健康狀況備受關注，他的家庭背景亦相當深厚——父親為前校長駱存斌、二叔是著名粵語片演員駱恭、胞姊為《信報》創辦人林行止妻子駱友梅，胞弟則是資深大律師駱應淦；不過駱應鈞從不自認出身書香世家，甚至曾透露因父親的嚴厲管教而選擇不生育，作風一直相當踏實低調。

駱應鈞因父親嚴厲決定不生育

駱應鈞與圈外太太結婚逾30年，至今一直沒有生小朋友。駱應鈞曾表示自己性格謹慎、顧慮較多，擔心自己不懂得如何做一個好父親；雖然太太很喜歡小朋友，但為了遷就他而打消念頭，兩人非常享受現在無兒無女、自由自在的二人世界。近日小紅書流傳一段駱應鈞接受訪問的影片，透露他不考慮要下一代的原因與父親有關：「我唔係曳，總之係唔聽講，你話東我就去西，到我考訓練班，佢嚟簽紙一直唉聲嘆氣，點會估到個仔去考演員訓練班？冇諗過，點解要揀呢條路？不過老一輩嘅人，四十歲老來得子，之前兩個係女，都有少少錫，表面叫順你意，但其實覺得『搞咩呀？點會去做呢啲？』」駱應鈞坦言這些事長大後對他造成陰影：「到我結婚都唔想生仔，如果我有個細路生得好似我後生嗰陣咁嘅樣，咁就真係好喇，我寧願唔要小朋友。我覺得係自己嘅問題，唯一遺憾嘅唔識得點樣去同我爸爸、媽媽溝通，我覺得係我自己嘅問題。」

相關閱讀：73歲前TVB綠葉王駱應鈞近況堪憂？內地「搵食」被捕獲 頸現青筋身形消瘦惹關注

駱應鈞謙稱家族並非書香世代

對於外界曾形容他出身書香世家，駱應鈞更加抗拒：「邊係乜嘢書香世家。爸爸40歲嘅時候我先出世，之前兩個都係姐姐，到我10歲、8歲，我爸爸都50歲喇，佢一個人做嘢養全家人咁大壓力，佢就極少講自己嘅事，但我年紀細，嗰時社會各樣嘢咩都唔識，我又唔識得問佢年輕時嘅情況。據我瞭解，我爺爺應該係做生意嘅，我爸爸10零歲嗰陣，我爺爺嘅生意已經唔好。我爸爸就自己喺廣州去上海讀書，去讀大學。但應該一啲都唔鬆動，嗰段日子其實要好節衣縮食嗰種。跟住佢應該係去讀法律嘅，佢曾經做過律師。但你落到嚟香港係冇用嘅，好在佢喺一間小學做校長，養起我哋全家人。我唔覺得我哋係咩書香世代。第一，祖先唔係有功名，亦都冇人係進士，你第幾代咩，冇人係秀才，似乎我哋嘅歷史，我爸爸亦都冇講過，但我仲唔覺得會有。」

相關閱讀：駱應鈞為大律師弟弟駱應淦戒酒 自爆離巢TVB靠高人指點拒回頭：避而不談免得尷尬

駱應鈞自認頑劣曾令父親失望

駱應鈞又稱自己當年令爸爸失望：「我家姐、細佬讀書唔錯，我真係好令佢失望，我真係屬於頑劣。嚴格嚟講，我都唔知自己大腦得是但一邊係好嘅，另一邊係好差嘅。譬如話，如果以睇書嚟講，因為我哋嗰時冇娛樂，我其實3、4歲已經睇報紙。我爸爸會睇啲佢哋嗰個年代，嗰時喺香港有啲上海嘅作家，好多上海嘅作家嚟咗香港，佢哋喺報紙投稿、喺雜誌投稿。我爸爸就算咁慳嘅人，佢都會買嗰上海幫嚟港嘅作家、嗰啲編輯，佢哋嗰啲雜誌嚟睇。我哋又冇娛樂，爸爸睇完就到我哋攞嚟睇。我媽媽睇武俠小說，佢睇完我又攞嚟睇。我9歲已經睇金庸啦。我媽媽租書返嚟睇，佢去打牌，我就攞嚟睇，一睇就愛上。」他續說：「你又要體諒下我爸爸咁大壓力，一個人又唔後生，咁遲先結婚，咁遲先有細路，我阿嫲又喺內地嚟咗香港同我哋一齊住，一個人要養咁多人，其實已經好辛苦㗎啦。所以佢冇精力同我哋溝通其他嘢。佢當然好關心我哋嘅學業，但佢都唔識得對住我呢個咁頑劣嘅仔，都冇辦法。」

相關閱讀：駱應鈞現身內地吞雲吐霧超瘦削 大病纏身曾停工4個月休養

胞弟駱應淦成駱應鈞戒酒動力

年輕時駱應鈞曾被傳酒量驚人，但原來是事業失意而借酒澆愁：「因為喺工作中搵唔到滿足感，唯有去猜枚、飲酒，感覺好似⋯⋯原來我都可以贏。」後來事業漸有起色，他亦決心戒酒。他透露，戒酒除了是因為事業步入正軌，更重要是不想令家人蒙羞，特別提到了自己的親弟、香港資深大律師駱應淦：「如果我因為飲酒出事就丟架，無謂令人蒙羞，我好感激家人，由我入行開始，從來冇畀過壓力，好支持我。」駱應鈞曾表示50年代粵語片演員駱恭是他的二叔：「我爸爸有6兄弟，爸爸係最大，駱恭係我二叔，佢落到嚟香港，唔係即刻入影圈，佢係教書，喺我3、4歲嘅時候先入行，即係佢入行已經40幾歲，所以係做中年角色，聽講啲人鍾意用佢。因為當時阿嫲同我爸爸住，阿叔都會返嚟探吓阿媽，嗰陣我聽佢講，佢係誇張到教書份工一個月都返唔到一日，所以佢有一個御用代課老師！二叔（拍戲）真係好忙，佢拍一年戲，多過我喺影圈拍幾十年，一定有佢嘅個人之處。」駱應鈞還說二叔很捨得花錢置裝：「可能有時因為製作費問題，劇務話佢聽要做有錢佬，要穿禮服，如果你有私伙，人哋就唔使幫你張羅，所以對佢都好大幫助，拎咗好多有錢佬角色嚟做。」