玫瑰戰爭｜陳自瑤慘遭迷姦崩潰瘋狂尖叫遭傅嘉莉公報私仇狠摑：每一巴都係真打

更新時間：20:00 2026-11-13 HKT
發佈時間：20:00 2026-11-13 HKT

由騰訊視頻及TVB聯合出品的台慶劇《玫瑰戰爭》昨晚（12日）播出的第四集《玫瑰》「妒恨交織」，飾演關子盈的（陳自瑤飾）可謂厄運連連，先因為梁菲雅（傅嘉莉飾）得悉暗戀多時的李德龍（馬國明飾）與多時陳自瑤有地下情，結果藉拍掌摑戲公報私仇，連環狂摑陳自瑤！

陳自瑤獲網民搞笑賜封「兜巴瑤」

傅嘉莉更耍手段陷害陳自瑤捲入小三醜聞！雖然陳自瑤因而身敗名裂，但天誠老闆陳雲生（陳豪飾）仍處處維護，惹來暗戀陳豪的經理人藍鳳儀（姚子羚飾）妒忌，暗中收買林安安（鄺潔楹飾）向陳自瑤落藥慘遭迷姦。傅嘉莉和陳自瑤挑機兇狠嘴面引爆熱議，陳自瑤獲網民搞笑賜封「兜巴瑤」。

陳自瑤被迷姦戲尺度未見太大膽

陳自瑤這場被迷姦的戲雖然尺度未見太大膽，只見陳自瑤被男人推在床上，鏡頭一轉已經完事，陳自瑤露肩坐在床上。不過當陳自瑤懷疑自己被迷姦後，致電姚子羚大興問罪之師一幕同樣震撼，由於姚子羚全程極惡意地故作不知情，受盡各種打擊及刺激的陳自瑤終極崩潰，瘋狂爆喊之餘，並聲嘶力竭地連環瘋狂尖叫：「點解要係我呀，點解係我呀！」最後激動到極的陳自瑤怒掟電話宣洩滿腔怒憤，淚如泉湧相當惹人同情！談到被迷姦的場口拍攝，陳自瑤透露由於當日是由被落藥場口直落拍攝，要一下子由低能量的昏沉狀態、跳去高能量的崩潰狀態著實高難度，加上拍攝時間緊逼，未能有足夠時間培養情緒，埋位前一度信心不足，但最後竟在「試當真」情況下一Take順利完成拍攝：「拍之前我真係冇信心，因為我覺得自己個狀態未Ready，仲係之前嘅昏沉狀態，驚自己演得唔好。但因為導演話冇時間喇，你試當真啦，咁我就覺得『好啦，盡做啦』。其實埋位之前幾秒，我都仲未有太大感覺，但好神奇嘅係一roll機嗌Action，我跟住劇情開始望吓四周圍又望吓自己，我就突然進入咗嗰個極崩潰嘅狀態，我自己都好Surprise，可以幾秒之內進入到狀態，都要多謝劇本同劇組。」有網民留言：「陳自瑤角色令人心痛，演技更上一層樓」、「經理人是壞人，個個都話幫，但其實個個都唔幫。」

陳自瑤被摑了十多巴掌便完成

傅嘉莉和陳自瑤亦引爆熱議，劇情講述傅嘉莉拍攝戲中戲時，為了可借勢反覆喪摑陳自瑤，出手時不是Timing出錯、就是打的位置不對；最過份的傅嘉莉在人前還要扮晒無辜，令陳自瑤相當唔忿氣，才演變至之後的反擊及扭打場面。雖然鏡頭前兩位女角都是狠角色，但其實拍攝現場氣氛融洽，傅嘉莉和陳自瑤未埋位前與劇組有商有量研究動作走位，傅嘉莉拍畢掌摑戲後，亦有主動慰問陳自瑤。為了多角度呈現掌摑戲增加真實感，每次至少有三部攝影機對準兩位主角，三位重裝備攝影師還要瘋狂走位配合，台前幕後付出不少血汗。陳自瑤受訪時透露「每一巴都是真打」，並指由於對手傅嘉莉很專業，故她前後只是被摑了十多巴掌便順利完成拍攝：「其實真係冇計過打咗幾多巴，但就巴巴都係真打，因為想有真實嘅感覺，借位會變咗好假，所以我非常同意真打。拍之前我仲同傅嘉莉講『你唔使驚，你狠狠地摑落嚟啦！』」對於有網民發現陳自瑤面頰紅了一大片，她笑說：「塊面嘅紅全部都係真，冇化妝，但冇問題啦，最緊要拍出嚟真實。」至於負責打人的傅嘉莉坦言拍攝時「梗係大壓力」：「因為好驚會摑到陳自瑤，咁我都有嘅經驗，所以嗰場戲盡量唔戴任何首飾，指甲就盡量整短啲，同埋盡量就位。好似所有full shot，我全部都係借位嘅，甚至乎望落我好似好大力打埋去，但其實去到陳自瑤塊面呢，我都係撥落去推佢塊面。但當真係close up時，因為會睇到陳自瑤塊面嘅肌肉，所以就要真打，呢場戲大家都辛苦了。」傅嘉莉續指真打亦有真打的技巧：「即係唔會用死力，唔會用個手掌心去打、唔會冚到耳仔、唔會指甲刮到佢塊面。我哋都係奉行住寧願硬食一次，都唔好打幾次。但因為咁樣打Yoyo我都好心痛，但冇辦法，都多謝佢信任我呢個對手，令出到嚟效果好好，我都好開心。」不過總監製佳導笑言一度誤會二人有私怨：「我初初睇片，以為陳自瑤同傅嘉莉真係唔啱、或者有咩私怨，因為吓吓都打到好真，但又唔敢問佢哋。後尾我睇番花絮，又見到佢哋笑晒口完全冇嘢，所以我覺得佢哋呢段戲真係演得好好，呃晒。」