直樂VIURIETY丨簡淑兒回應朱智賢半裸浸溫泉事件：做幕前要識保護自己
發佈時間：02:01 2026-11-12 HKT
簡淑兒和麥大力一起拍攝ViuTV節目《直樂VIURIETY邊個瞓梳化？》，簡淑兒和麥大力表示上一次兩人一齊做節目還是剛認識的時候，麥大力表示仍記得是那一日，因為是夢想成真的一日，不過簡淑兒笑他會記得是因為數學好，平時去超市最喜歡格價，但承認麥大力在記紀念日日子方面比自己叻。
簡淑兒自認投資「燈神」
講到麥大力近日斥約1,420萬元購入西半山嘉富臺一伙三房單位，簡淑兒表示他在投資理財方面很叻，自己曾提議過其他地區，但他覺得這一區好，她都會聽老公的說話，「我喺投資方面係燈神，有時佢叫我唔好買我偏偏買咗，最後都係會被佢講中，所以之後喺投資理財方面都會聽佢講。（你邊方面叻過老公？）做家務，打理屋企，佢比較冇耐性，我會令佢平靜落嚟，同埋佢係負責搵錢。」
簡淑兒直認努力造人
至於結婚一年是否仍想繼續二人世界？簡淑兒直言一直有在努力造人，不過老公經常要飛，加上他們又將會搬屋，待處理好所有事情後再計劃。
簡淑兒未被要求性感演出
講到好友朱智賢在HOY節目中爆當年拍《3日2夜》時曾被全男班攝製隊要求上身半裸浸溫泉，令她委屈得匿埋房喊，亦試過拍潛水戲份時被要求「唔拉拉鏈」，最終黑面霸氣反擊，簡淑兒也曾經拍過《3》，問到可曾遇過類似情況？她表示自己拍過兩輯，都沒有浸溫泉和泳衣畫面，可能沒有人想看才沒要求她，問到是否事前知道不用性感才會答應拍攝？她指當時不是TVB經理人，是另有經理人，相信經理人有為她篩選過，如果真的遇到類似情況，都會像朱智賢一樣拒絕，「當拍得唔舒服，觀眾睇到都會覺得唔舒服，嗰排都好似特別興（性感），但做幕前要識保護自己。（婚後會否因為老公而拒絕性感？）我有問過佢，佢冇所謂，着泳衣都可以，佢會覺得性感唔係啲乜嘢，just a style，唔會用色情眼光去睇，覺得好平常，仲會好驕傲有人望佢老婆，我着泳衣時，佢影得最多相，唯一影得最開心嘅時候，我問佢『可唔可以擺上網？』佢會話『why not？』」
朱智賢最差時候已過
提到朱智賢亦在節目重提當年偷食人夫黎振燁，以及後來與謝東閔的情變內幕，簡淑兒表示冇看過節目，不知是她主動提及還是被主持人問到才講，「如果人哋問到唔講又好似好大牌，但講出嚟又好難講出讓所有人都滿意嘅答案，但我都知佢個人硬淨好樂觀，相信佢冇乜嘢。（節目播出後惹網民批評，會唔會聯絡關心佢？）佢最差嘅時候已經過咗，做呢行慣咗啲人唔係講好就係講壞，特登去問仲尷尬，可能佢冇乜嘢，或者喺佢嘅角度，都係禮貌回答主持嘅問題。（會唔會介紹男仔畀佢認識？）有諗過，但相信佢都有人追，佢咁靚女。」
