關心妍「衣錦還鄉」佛山南海開騷望出道25周年重返紅館

更新時間：22:45 2026-11-11 HKT
發佈時間：22:45 2026-11-11 HKT

關心妍日前「衣錦還鄉」，在家鄉佛山南海舉行《聽2026 演唱會》，吸引近5000樂迷買飛支持，全場爆滿，好友張栢芝亦送上花籃恭賀，而女兒楊榮心後台表現雀躍，除帶領祈禱外，更模仿媽媽「化妝set頭」，甚有星二代味道！演唱會開始時，關心妍一口氣唱出多首金曲，更用南海話「自家人」與「鄉里」打招呼！

女兒陪伴唔影響學業

重返「主場」開個唱，Jade一共準備5套服飾，除大唱金曲外，場外亦有慈善攤位為弱勢社群募捐，非常有善心：「其實我都成日返嚟（佛山），真係好感謝家鄉庇佑，可以每年都喺度開演唱會。真係仲密過香港開騷。其實每次嚟到都有帶心心睇吓，但每次都來去匆匆，做完show第二日又要走，加上佢要返學，所以佢都未好有『家鄉』嘅Concept。頭先佢都係一路陪我、一路溫 science同數學。其實我平時負責係中文同數學，老公就睇英文同數學，所以每晚煮飯就會睇晒功課，知道佢陪登台唔影響學業。」Jade表示當地龍舟節最熱鬧，希望未來有機會帶女兒感受一下。

關心妍快出道25周年

關心妍表示今次巡迴個唱的主題由2025年開始，一直希望將個唱帶回香港做終點站：「其實上次紅館20周年開始，已經差不多五年時間，亦就快出道25周年，忽然間嚟到25周年，一直都希望最後站係返香港，我哋都睇下紅館個期批唔批，希望可以返去紅館，有機會可以喺紅館做我25周年香港站。」

楊榮心苦練半年打鼓合奏《負擔不起》

這晚演唱由女兒楊榮心做「嘉賓」，不過今次拒絕表演側手翻，改為打鼓與媽媽合奏《負擔不起》，令觀眾非常有新鮮感：「因為我好想俾歌迷見吓心心，唔經唔覺咁大個女，我問佢紅館試過打翻筋斗、合唱、清唱，我覺得佢又長大咗，咁啱佢開始學打鼓，我叫佢練下先，練到差唔多就幫我打，佢真係苦練半年！頭先台上我都唔敢望佢，忍住唔好打攪佢，佢好淡定但我就緊張到背脊出汗，依家係佢表演完我鬆一口氣！」Jade笑指未知女兒還有甚麼「秘技」，估計跳舞成下一站的表演項目，而囡囡表演後都到台邊為媽媽拍手打氣，更不時和唱非常投入。