《女神2》齊集直播室真情剖白 Oscar方智弘被斥「渣男」唔開心 轉選何沛珈係忠於自己意願
發佈時間：20:19 2026-11-11 HKT
TVB戀愛真人騷《女神配對計劃2》自播出後話題不斷，由配對選擇到女神品格都成為網絡熱話，為解開網民及觀眾迷思，主持林盛斌Bob、7位女神連同節目總策劃、監製及一眾求愛勇者，日前雲集myTV SUPER直播室進行「答問大會」，就近日連串爭議進行真情剖白！
方智弘了解深咗才做決定
談到最新一集，最大爭議劇情莫過於原本偏向俞可程（Kanis）的方智弘（Oscar），突然轉投何沛珈（Roxanne），遭批評「渣男」！面對坊間爭議，Oscar坦言有少許不開心，但仍應阿Bob要求，大方公開選擇時的心路歷程：「我覺得我係需要了解一個人深咗，先可以做一個決定」、「呢個（轉選擇）係我跟從自己內心，我知道好多人一開頭對我揀Kanis好支持，我都收到好多DM叫我千祈唔好轉人，但我覺得最終我都係要忠於自己意願，咁先係真正嘅我。」
林盛斌與監製力撐方智弘
對於Oscar的選擇，Bob及監製Manho均開腔力撐，阿Bob更力挺Oscar絕非渣男：「了解咗覺得唔係嗰個vibe，想轉（選擇）就係渣男？咁我諗地球上好多男人都係渣男嚟喎」、「大家唔好以為（佢哋）感情好深厚，大型水上樂園、五角枱（嘅拍攝）都係一日半日嘅事」、「絕對唔可以用渣男形容呢個男孩子，喺我嘅認知，希望大家可以理性同埋口下留情去留言」，並希望觀眾不要覺得有人爭或有人轉選擇就是壞人。Manho：「有時佢哋見一日我哋剪成兩集，變相觀眾視覺會覺得係幾個星期，但其實可能佢哋只係見過兩、三次。」 Bob與Manho續指新一季《女神》描述的感情關係，比第一季更複雜，不適宜作比較，並鼓勵大家當全新的戀綜收看，更透露後續將有更多「原來係咁」及「意想不到嘅發展」。
陳星妤再次為玩遊戲致歉及反思
此外，陳星妤（Yvette）與陳若思（Amber），亦就阿Bob要求當中抱抱、以行動粉碎不和傳聞。Yvette亦再次為自己玩水上遊戲時過份投入致歉及反思：「我真係冇心整到Amber，但亦真係有啲位係大意咗同疏忽咗」、「我聽取咗大家聲音後，知道有好多嘢要反思、有時投入之餘都有好多嘢要顧及」、「我把關力度同方式係錯，下次要做番更好如果再有類似情況。」身為資深水上遊戲主持的阿Bob，坦言拍攝遊戲節目確實容易手腳當災，並以第一目擊者身份，保證現場絕對沒有任何蓄意的惡意，又大讚Yvette作為隱藏女神表現很好。
李爾晨否認做過「兵之行為」
而同時就「收兵」是非作出回應的Yvette，席間大方玩自嘲稱呼李爾晨（Kyle）為「兵王」，Kyle「接招」時除強調自己沒有做過任何「兵之行為」，還突然「愛的宣言」指過去11年有Yvette相伴好幸福，贏來全場歡呼聲。Kyle：「其實我覺得有Yvette喺身邊係一件好幸福嘅事，因為大家有啲咩事，都會搵對方傾訴，我覺得未必個個人都有（可以真心傾訴嘅對象），我有陳星妤。」席間，Bob怪Kyle在Yvette專屬題時沒有衝出去「表現自己」，又追問Kyle想Yvette與自己還是Oswald配對？Kyle回應時竟再度意外來了個「深情告白」：「我聽完Yvette講（有Feel）嗰吓其實好衝擊，咁我嗰刻衝出去就代表表態喇咯，呢個決定太重要，我唔可以立亂衝出去，唔通你講完之後我話『Yes，Yvette I love you！唔可以咁。』Manho聞言即篤爆Kyle當日聽完Yvette告白後Hang足半日機，並笑言：「你依家咁問佢，佢又要Hang Hang機架喇！」並預告：「呢個謎節目會解開。」
