朱智賢拍《3日2夜》被要求半裸浸溫泉 拒拍辣㷫導演 遇過份要求無奈：轉頭攞個胸畀你
發佈時間：11:57 2026-11-11 HKT
朱智賢（Ashley）當年憑旅遊節目《3日2夜》大騷傲人身材而成功彈起，成為不少網民心目中的性感女神。但在鏡頭前風光性感的背後，原來隱藏着不少委屈與辛酸。近日朱智賢作客HOY節目《九運會客室2》，接受主持伍詠薇及李凱賢（Brian）訪問時，首度剖白當年拍攝《3日2夜》時遭遇不合理對待的「黑歷史」，驚爆曾被全男班攝製隊要求上身半裸浸溫泉，令她委屈得匿埋房喊，亦試過拍潛水戲份時被要求「唔拉拉鏈」，最終更黑面霸氣反擊。
朱智賢遭要求半裸浸溫泉
節目中，朱智賢重提這段「唔想做但硬食」的慘痛經歷。她憶述當年仍是新人，有次隨隊遠赴台南拍攝，期間突然被帶到一個規定必須全裸浸泡的溫泉，沒想到工作人員竟要求她只穿泳褲上陣拍攝。朱智賢當時大感愕然：「我就話吓點拍，『你着住條泳褲咪得囉』，我話唔得喎，咁會俾人鬧，呢度規矩係要（除晒）。佢哋話唔緊要，冇人嘅時候快快脆脆拍咗佢。」在再三追問之下，她才驚覺對方口中的「着泳褲」，竟然是指「上面乜都唔着」，要求她上身半裸、僅露背脊入鏡。
相關閱讀：朱智賢談偷食黎振燁始末：自己白痴信佢分居 背謝東閔出軌淚揭分手內幕稱「好愛佢」
朱智賢越諗越唔對路
起初身為新人的朱智賢勉為其難答應，但臨門一腳卻「越諗越唔對路」，深怕動作稍大就會春光乍洩。她在節目中指着自己的胸側，猶有餘悸地形容當時的恐懼：「諗諗吓臨尾我就驚，唔係喎，好似唔係好對路喎，你話背脊啫，側少少都睇到㗎！」
朱智賢面對全男班工作人員
最令朱智賢感到崩潰及無助的是，該次外景的攝製隊竟然是「全男班」陣容，連一位女性工作人員都沒有。她激動表示：「嗰個trip全部都係男士，一個女都冇，一個都冇！我問唔到人我有冇走光啊，即係我冇理由問個男士，你睇唔睇到呀！」她直言當下感覺極度不舒服，亦缺乏安全感：「我唔得喎，咁走光咁點呢？唔通佢睇到，佢又會同我講咩：『阿朱啊你露出嚟啊』，佢唔會㗎嘛！」。
相關閱讀：前TVB「咪神」朱智賢大派福利 黑色深V內衣配超短熱褲「上下失守」 晒白滑長腿陷走光邊緣
朱智賢一句辣㷫導演
朱智賢最終鼓起勇氣臨陣反口向導演說不：「我都係唔好啦咁樣。」豈料此舉即時惹來劇組不滿：「跟住佢哋就嬲嬲地囉，話『頭先講咗拍㗎嘛，做乜又唔拍啊』。」面對現場的群體壓力，朱智賢為了企硬底線，不惜搬出爸爸做擋箭牌：「你自己都係人哋爸爸，你都應該明㗎！」沒想到這句「你都有個女」瞬間辣㷫對方：「佢着咗！其實我只係想佢imagine（幻想），如果嗰個係你個女，你都唔會想.......呢件事係咪要去到咁盡呢？」
朱智賢委屈匿房爆喊
雖然最終成功避過半裸出鏡的危機，但當時勢孤力薄的新人朱智賢卻承受着巨大心理壓力，委屈得躲在房間內哭泣：「最後係冇拍，我係好想喊嘅，但係我匿埋咗去房唔知點咁，因為好驚，當時係新人，你喺個group度又未拍完，你又reject咗佢哋，又唔知跟住會發生啲咩事。」
朱智賢寸嘴反擊過份要求
朱智賢坦言，《3日2夜》之所以廣為人知，很大程度是因為初期不少女主持身穿泳裝出鏡而掀起話題。除了半裸溫泉事件，朱智賢亦大爆另一次「潛水衣事件」。當時她換好潛水衣準備拍攝潛水戲份，卻被一名女導演要求不要拉上胸前的拉鏈：「佢話你記住呢，冇拉鏈喎，出到嚟先拉鏈。」朱智賢當下覺得極度反感，認為對方同為女性卻毫不尊重女性，嬲爆的她當場黑面直斥：「得喇，轉頭攞個胸畀你！」不過，朱智賢發完脾氣後，最初仍硬着頭皮聽從指示，在未有拉上拉鏈的情況下走到鏡頭前。幸好當時在場的攝影師（Camman）亦看不過眼，主動開口問她為何不拉好拉鏈，朱智賢去到那一刻才如釋重負地將拉鏈拉上。
相關閱讀：朱智賢澄清凸肚腩非懷孕 爆40歲年紀大難控制體重：有朋友差啲留言恭喜
