璀璨之城大結局｜張智霖演奸角獲讚神級演技被網民力推攞視帝：觀眾開心已最大收成 爆劇本原先更激要停拍再寫
發佈時間：00:15 2026-11-07 HKT
由張智霖、吳卓羲、張曦雯及高海寧等主演劇集《璀璨之城》昨晚大結局，一眾演員到澳門出席「全城熱話《璀璨之城》結局夜」，對於劇集去到最後一集，張智霖指真的「眨吓眼」就到，又謂好感恩能拍此劇。張智霖和高海寧睇完大結局都忍不住落淚。
張智霖兩分幾鐘獨腳戲網民評神級演技
提到大家都很接受他飾演奸角，張智霖表示演員應該要不停畀更加多面觀眾去看：「我希望大家都會認同我係一個演員嘅身份，（噚晚場兩分幾鐘獨腳戲，啲網民話你係神級演技，力推你攞視帝。）多謝喎！我好似都做過幾次頒獎嘉賓，咁我係咪…（係時候上嚟攞？）算唔算係升呢？（懷疑自己冇得攞？）冇諗呢啲嘢，我到咗而家呢個年齡，都係想盡量自己有能力嘅時候做好角色，即係唔係再為自己往後去鋪排想點樣，觀眾睇得開心已經係我最大嘅收成。」
張智霖不想因獎擾亂心情
他也坦言不想因為獎項而擾亂自己心情，無論是否有提名，有份參與就高興，又指參加頒獎禮要看到時會否跟演唱會撞期，但自己劇集能成為2026年最佳劇集：「因為大家都花咗好多心機去突破自己，我祝福《璀璨之城》會係最佳嘅劇集。」
張智霖回應劇情冇需要除衫
對於網民指劇中只有他一個冇除衫，張智霖笑言以前已除了很多次，今次的劇情也沒有需要，至於是否想拍第二輯？他指大家先看完大結局。
張智霖贊成張曦雯性感戲作適當修剪
對於昨晚一集，張曦雯的性感戲由七分鐘剪到得兩秒，他坦言看完之後確實做出了適當的修剪：「睇到監製都有回應話TVB好尊重觀眾嘅意見，我覺得係啱嘅。即係觀眾如果覺得係太刺激啦，OK！冇咁刺激囉！」至於之前他在訪問中笑談張曦雯肯拍半裸戲是因為她「唔輸得」而被網民批評輕佻，他說：「好彩你都知我係講笑，其實真係講笑，如果大家唔係好鍾意開玩笑，咁咪認真啲、嚴肅啲去回答問題，即係我都要不停上課，我都要多謝大家指點！」而問到劇集最初傳有25集，他指一直也是20集，又爆本來劇本更激，故要停拍再寫，並非因為任何演員。
張智霖想轉型做導演拍AI劇演「Bug」
今次張智霖轉型演奸角成功，他坦言也希望可轉型做導演，因畢竟自己有30多年的經驗，更透露很想拍關於AI影片的故事：「我諗到一個好有趣嘅古仔，而家大家好鍾意睇AI劇，我想演AI劇，即係我做返好似AI嗰種不合理，啲門突然間嗰邊開，突然間又唔連戲，我覺得好有趣，其實好多時係啲bug，但我就係想演個bug出嚟就好好笑。」
張智霖預告目標明年紅館開騷
另外，早前張智霖佛山開騷時與舊愛許秋怡合體唱《片片楓葉情》，袁詠儀（靚靚）更在台下面帶笑容拿手機拍照，他承認是跟靚靚一起邀請對方：「我哋覺得佛山係我嘅籍貫，我覺得嗰度，尤其係鍾意廣東歌，《片片楓葉情》係要唱一次嘅。」又透露一月份許秋怡會有一個演唱會，自己到時都會去，當是互相支持，而他在2027年也會都不同地方做巡迴演唱會，也希望能在香港舉行，不過因為啟德場地太大，所以目標是紅館。
