前新聞王子陳書君剖白14年前出櫃創傷 曾遭母以死相逼 堅拒騙婚：呃女仔先係無良心
發佈時間：11:00 2026-09-27 HKT
前有線新聞首席男主播陳書君（Vincent）在2026年5月宣布正式離職，結束長達8年的新聞主播生涯。回復自由身的陳書君曾表示：「終於是徹底自由了，我要去過真正寬廣的人生。」昨日（26日）陳書君在自家YouTube頻道罕有拍片講家事，陳書君在今年年初與同性密友Steven修成正果，二人將開展人生新一頁，但原來甜蜜背後，承載住一段極其沉重、甚至帶點創傷的家庭回憶。
陳書君首度公開隱藏多年經歷
陳書君首度公開自己隱藏多年的私人經歷，剖白自己14年前面對父母「出櫃」的痛苦掙扎。他坦言當年因「唔想再扮唔係自己」而決定向家人剖白，可惜不單得不到支持，母子關係更面臨崩潰：「媽咪發晒癲咁，情緒十分激動，講咗啲好難聽嘅說話。當然，我都講咗啲難聽嘅說話，因為佢鬧我，鬧到係『你不如死咗去算啦』。」媽咪更曾激動得一度以「跳橋」威脅，而這個死結至今依然未解開。
相關閱讀：有線男主播陳書君宣布與同性密友訂婚 佈置浪漫純白花海鋪燭光之路 甜晒方型巨鑽：最美好的冒險
陳書君稱中秋節承載一段極其沉重回憶
在片中，陳書君一臉凝重地表示本來中秋節是人月兩團圓、一家齊齊整整食飯的開心日子。不過，對他而言中秋節卻承載住一段極其沉重、甚至帶點創傷的家庭回憶：「每一年過中秋，我都會諗返起嗰陣發生嘅事。呢件事其實我以前喺social media都有講過，不過已經係幾年前嘅事了。因為當時都仲係做緊主播啦，身邊嘅同事都覺得呢啲嘢都唔好攞出嚟講，費事有啲人藉此大造文章，所以嗰個post出咗10分鐘已經delete咗。咁而家我自由身啦，我都覺得不妨同大家分享一下自己嘅一啲諗法、體會，或者我嘅更多私人領域嘅事啦。」
陳書君稱在2010年第一次拍拖，雖然當時只有10多歲，但已經清楚自己的性取向，只是未有向家人提及，亦未有想過他們會「咁快知道」：「咁多年爸爸同我、媽咪嘅關係都唔好，反而我同我媽咪關係就特別好，所以一直都係我同媽咪傾偈或者講嘢交流會比較多啲，感情都真係好好。有一排就好奇怪，無論我着咩衫、孭個咩袋，我屋企人都會話『點解你今日着成咁嘅？』、『點解孭個咁嘅袋？』後來我有啲親戚同我講話『你父母應該已經知道咗你啲事。』唔怪得喇，所以從嗰一刻開始，我就知原來佢哋係知情嘅，但係我哋冇攤開嚟講，因為我覺得時機未成熟，同埋好明顯地係唔接受。」
陳書君拒絕做違背良心的事
直到2012年，陳書君和爸爸因為一些生活瑣事（如無熄燈、電視開太耐）而爆發激烈衝突。當時在宿舍居住的陳書君與爸爸用短訊鬧交，再加上母子之間產生了隔膜，結果一時衝動下決定用短訊向媽咪坦白，直言「唔想再扮唔係自己」：「結果就係冇向好嘅方向發展，情況非常之差。媽咪發晒茅、發晒癲咁啦，講咗啲好難聽嘅說話。當然，我都講咗啲難聽嘅說話，因為佢鬧我，鬧到係『不如死咗去算啦』。因為我以前屋企附近有一條鐵路橋，佢就係威脅話佢要去跳，我相信佢真係可能會去。因為我好細個嘅時候，佢試過一晚落大雨，同我爸爸嗌交之後，真係帶我出去話要跳樓，雖然冇真係跳，但我好記得嗰個場景。所以我相信佢可能會真係去做。當時我嘅諗法係，你話我不孝，話我點都好，我無可能做一件違背我良心嘅事，或者違背我個人喜好，違背我個人嘅自主，尊重自己嘅權利。我也無可能做啲咁冇良心嘅事，就係去呃一個女仔，呃兩個家庭，只為咗去fulfill你哋對我嘅所謂期望。我覺得呢樣嘢係我絕對喺良心上、道義上，我都絕對唔會做嘅。」
相關閱讀：HOY《我要做主播》再爆是非 前主播陳書君怒揭黑幕？ 自爆被逐出導師名單：公道自在人心
陳書君出櫃14年與家人至今仍未和好
出櫃已經14年的陳書君坦言問題至今仍未解決：「我覺得未必有呢個要去解決，包括我同另一半都係咁樣認為、未必一定要得到家人嘅祝福，我覺得唔係真係咁緊要。因為其實你成年之後，你就係自己一個家庭、自己一個獨立個體。你基本上已經同你本身嘅原生家庭已經係分離咗。當然關係好係一個bonus啦，唔好都唔緊要，最重要嘅係take care你自己、take care你身邊嘅人，身邊愛你嘅人，真正接受你係你嘅人，呢啲人反而更加重要。我唔想理會自己嘅屋企人，但係客觀上，我真係冇辦法做到佢哋所想要我做到嘅事，但我亦都唔可以違背我嘅良心，去做啲唔啱嘅事。我覺得而家已經大個仔，我有能力、有勇氣去面對嗰一段歷史、嗰段過去，我唔知呢段影片出咗去之後，大家會點睇，但我覺得把佢講出嚟希望或許可以畀一啲朋友，喺決定是否出櫃或者作出人生生活選擇時，提供一些參考，又或者聽完之後，可以自我賦能、自我強大。」
