梅艷芳母親離世｜梅啟明駁斥孫仔搞梅媽身後事 或申禁制令爭遺產：孫就係孫，仔就係仔
發佈時間：11:32 2026-08-31 HKT
已故樂壇天后梅艷芳的母親覃美金（梅媽）於昨日（8月30日）離世。長子梅啟明昨日下午趕赴醫院，並向傳媒高調表示將以兒子身份主理母親身後事，更揚言會動用梅艷芳信託基金為梅媽「風光大葬」。然而，梅媽生前好友、資深傳媒人潘小文隨即踢爆，梅媽生前早已立下遺囑安排身後事，並全權交由孫兒處理，直指梅啟明根本沒有資格參與。面對潘小文的指控，梅啟明毫不退讓，強硬反擊對方「冇資格同我爭」，更揚言會透過法律途徑爭取權益。
潘小文爆梅媽早立遺囑
梅媽生前早已公開與長子梅啟明脫離母子關係，兩人據悉已有長達兩年時間未曾見面。昨日同樣現身醫院的梅媽生前好友潘小文向傳媒指，梅媽生前已妥善立好遺囑，並明確將身後事交由孫兒主理：「Auntie（梅媽）生前已經同呢個人脫離咗關係，事實上，佢的而且確係 Auntie個仔，佢有權做任何嘢，但係家屬嘅意願係希望低調，同埋 Auntie生前亦都立咗遺囑，已經安排咗自己嘅後事，明白梅啟明先生嘅心情，但係都希望佢尊重家屬嘅意願。」
相關閱讀：梅艷芳母親離世丨糾纏20年遺產爭奪戰落幕 一文睇清梅艷芳遺產隨梅媽百年歸老後去向
梅啟明：潘小文無權干預
潘小文此番言論，等同直接否定梅啟明主導身後事的權利，並指出身後事及相關安排梅啟明均無權干預。梅啟明對此盤否定，直指潘小文無權干預：「呢個唔需要理會佢，孫就係孫，仔就係仔，再加上佢係冇權去處理任何嘢，佢話有遺囑，冇用嘅，我會處理，搞咗啲有關嘅嘢先。」 當被問及若法律判定梅媽遺囑有效時會否遵從，梅啟明激動表示：「咁我咪又搵律師處理囉，我一定唔會俾佢咩。根本嚟講，佢冇資格同我處理呢樣嘢，佢喺阿媽身邊就唔會令到老人家死啦！呢個係好嚴重嘅問題！」。
梅啟明：佢冇資格同我爭
現時梅啟明與梅媽孫兒及潘小文一方各執一詞，對於會否演變成爭奪後事主辦權的法律戰，梅啟明態度十分強硬，表明必定會透過法律力爭自身權益：「唔緊要㗎，一，佢冇資格同我爭，二，喺法律上佢更加冇，如果講遺囑我更加要去爭取。」
梅啟明：搵律師法禁制令
被問到若孫兒與潘小文一方採取高度保密及低調方式辦理後事，梅啟明會否擔心被蒙在鼓裡，他信心十足地直言絕不可能：「冇冇冇冇冇，呢啲唔係佢處理嘅問題，No, no，而家我都知啦，點唔俾我知？我聽朝就去處理嗰啲嘢，因為要攞咗證件嗰啲嘢之後先處理，再唔啱我都去搵律師發禁制令，禁晒所有嘢，冇得郁。」
相關閱讀：梅媽覃美金離世丨梅啟明不排除再為梅艷芳所設基金鬧上法庭 指別有用心之人想動用遺產
