關楚耀激讚老婆甘心被收服：好似入咗邪教 做咗人夫洗衫煮飯攬晒上身丨獨家
發佈時間：08:00 2024-09-30
去年11月，關楚耀與網紅Joann結婚，已為人夫的他坦言責任感大咗好多，𠵱家會落手落腳洗廁所、洗衫、洗碗。對於老婆不滿被網民抨擊結婚妝容似鬼新娘於網上還拖，阿關即肉赤護妻：「老婆唔係發火，只係做返自己回應兩句啫。」他更大讚新娘子永遠係最靚，力撐Joann嘅新娘妝冇問題。採訪：方騫平 攝影：羅安強 場地：Hotel ICON The Market
關楚耀和林景程於剛播完的劇集《法證先鋒VI︰倖存者的救贖》獲好評，被封《法證》男版Twins，阿關坦言依依不捨「冼陽醫生」，對演戲更越來越有興趣：「由《法證先鋒V》恐怖情人『董應偉』到《一舞傾城》富二代『Marco』得到好大迴響，既有滿足感仲可以發洩內心陰暗面，好好玩。」
撐老婆反擊網民
阿關最感激老婆從旁畀意見，及時制止他因為傷患想辭演《一舞傾城》，阿關好似參加咗讚賞老婆大賽，對Joann讚不絕口：「佢除咗係我老婆，仲係我導師、朋友、兄弟，有多重身分，唔開心時開解我，總之同佢一齊感覺舒服好開心，佢唔止對我好，仲冧得掂我超級難搞嘅媽咪，拍拖咁耐未遇過好似我老婆咁嘅女人。」做咗人夫，平日形象好Chok的阿關學識買餸煮飯，洗廁所、洗衫、洗碗及抹地，「總之乜都係我。」問到是否被老婆完全收服？他即笑出聲：「哈！又唔好咁講，係我願意嘅，不過，我做直播時同網友講我係入咗『邪教』，可能內心係犯賤。」
對於Joann不滿被網民抨擊結婚妝容似鬼新娘於網上還拖，阿關輕鬆笑說：「佢心中成日會有團火，但做返自己。」又稱眼中新娘子永遠最靚：「當日佢結婚妝好靚呀，冇問題喎，冇所謂啦。」不過，阿關坦言較欣賞老婆素顏，感覺最舒服：「佢同班姊妹出去打卡梗係要化妝着好啲啦，要睇場合嘅。」成個訪問，阿關唯一扁嘴位就係投訴老婆只准他做人肉腳架，「佢彈我影啲相唔啱佢口味，我假假哋都係攝影師，開過攝影展㗎。」
