54歲梁小冰晒命式公開結婚24年保甜秘訣 自揭塵封秘密當年為梁朝偉選美 丨獨家
發佈時間：07:00 2024-05-04
54歲的梁小冰跟老公陳嘉輝齊拍TVB熱播劇《逆天奇案2》，演活坐監30年的落泊老婦角色。時隔26年重返娘家，梁小冰自揭收埋心底多年的小秘密，包括因為梁朝偉才加入TVB，雖然之後無緣合作，好彩仲有古天樂、郭富城、鄭伊健等當紥小生填補空虛，她更非常回味當年可以任摸白面古仔。郭晉安及歐倩怡昨日宣布結束18年婚姻，而小冰跟陳嘉輝結婚24年依然甜蜜，靚太更公開婚姻保甜秘訣，陳生把口甜得可怕。採訪：方騫平 攝影：譚志光
1990年港姐季軍梁小冰曾是當家花旦，7年間演過《血璽金刀》、《鹿鼎記》等32部經典古裝劇，被封「古裝皇后」，至1997年約滿轉往內地發展。今次重返TVB除因相識30年的幕後團隊外，還因角色跟真人性格反差好大，好有挑戰性。
懶湊仔有老公頂住
不論戲裡戲外，小冰都大讚結婚24年的老公，是將她由地獄帶進天堂的白馬王子，「今次拍劇有佢無微不至咁照顧，婚後由管家、湊仔、到管教全部係佢，我只係負責煮飯…煲劇起唔到身湊仔返學，哈！唔好意思囉，而且自己好瞓得，起身後咪側側膊，同佢講要買餸煮飯，佢又OK喎。」小冰唔停口讚老公：「佢瞓醒就讚『老婆你今日真係好靚』，又會從後攬住我話『老婆你好Fit，點解條腰咁瘦嘅？』」
感動出山冇被嫌老
對於重出江湖好評如潮，小冰感動到眼有淚光：「睇觀眾留言『掛住我』、『讚我好戲』、『仲話睇唔夠，想睇我多啲拍戲。』嗰種甜，睇見都標眼淚，我都快60歲喇，原來佢哋睇住我長大，冇嫌我老及肥…」小冰更拍心口承諾，如果觀眾想睇，會拍多啲TVB劇：「李司棋、黃淑儀40幾歲就演媽媽角色，自己都唔介意演，大家盡情搵我啦。」
翻Hit的小冰想當年，她自爆一件憾事：「20歲時一鼓作氣着泳衣參選港姐，口話想做演員，其實係想同梁朝偉一齊拍劇，因為五虎將紅到爆，但我1990年入到去，偉仔啱啱走咗喇，呢種擦身而過嘅感覺，𠵱家都飲恨緊，始終佢現時級數同以前差天共地，唔易接觸到。」但小冰唔死心，繼續力Sell自己：「不過，現階段我嘅成熟度，係拍到梁朝偉及周潤發。」
城城古仔依然靚仔
雖然同偉仔冇緣份，但小冰慶幸也曾跟TVB當家小生古天樂及郭富城拍過劇，最難忘《圓月彎刀》中奉旨摸24歲古天樂的「牛奶白皮膚」，時至今日小冰諗返起都會笑：「嗰時佢係白色(皮膚)稀有品種，喺我心目中𠵱家古仔都係咁靚，從來冇變過，只係顏色係黑定白啫，所以呢套劇紅遍中台兩地。」小冰又大讚古仔係非常認真嘅演員，每場都會用真眼淚：「有場戲嘅對白係『我想最後一次見到你嘅時候，摸清楚你塊面…』然後由額頭摸到落佢鼻哥、嘴巴及下巴。」問到手感如何？她大笑說：「咁個鼻梗係硬啦，但好滑溜。」至於32年前跟影帝郭富城合作古裝劇《風之刀》，小冰依然好記得，「當年26歲嘅城城好愛玩，得閒會用條繩篤吓你，直至23年後再合作電影《踏血尋梅》，感覺彷如隔世，𠵱家城城成熟咗好多，拍戲時穩重到不苟言笑，佢同古仔喺我眼中一樣咁靚仔。」另外，她又認為郭柏妍眼大大、眼仔碌碌好可愛，似足她當年出道，應該可以做古裝美人。
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
緊貼最新最快新聞資訊，請立即下載星島頭條App：https://bit.ly/3Q29Vow
