姚焯菲要買獨立屋詹天文竟然想植髮鍾柔美單拖出遊公開成年必做list 丨獨家

更新時間：07:00 2024-02-21
發佈時間：07:00 2024-02-21

3位「聲夢小花」姚焯菲（Chantel）、鍾柔美（Yumi）和詹天文（Windy）龍年齊齊18歲，對於將變大人有成堆目標，首要考車牌、做業主、獨自去旅行，甚至有人想植髮同買六合彩，相當爆笑。但Fans要留意返，3小花唔想公開試成績有任何差錯，因會影響入讀心儀大學及科目，所以預告事業會放慢腳步，各Fans忍耐吓。採訪：杜杜攝影：譚志光髮型:Hugo Poon@private i salon 化妝:King Yip、Bingo Chan@Kings Makeup

Chantel、Yumi和Windy對兔年發展相當滿意，各自推出了兩首派台歌，均在頒獎禮奪獎。展望龍年，3人各有目標，Chantel說：「會繼續突破自己，大家記得聽我啱啱出嘅新歌《初心小島》，希望可以延續2023年嘅好成績。」Yumi說：「拎咗獎係動力同鼓勵，令自己繼續向前行，但我唔會驕傲，會保持謙虛，唔好忘記初心，新一年想試多啲唔同嘅嘢，有幾首歌準備緊。」Windy說：「出多啲更好嘅歌，亦都要keep住歌嘅質素，唔希望太趕時間推出。」

Chantel最近推出以成長作主題的新歌《初心小島》。

走跳唱路線的Yumi，推出抒情慢歌《下一個暑假》。

Windy去年底推出首支快歌《大雕刻家》。

選科為將來勁有遠見

3小花齊於今年參加公開試，為升讀大學而努力。Chantel有諗過讀商科，但發現Music Business後就好有興趣，「幕前人想繼續行，一定要識得做幕後嘅嘢，Music Production或者A&R，除咗對自己有用，大個都可以幫到新嘅artist。」原來她想為未來創立娛樂公司鋪路，「好想試吓，可以將自己嘅音樂知識再擴大。」Yumi就決定修讀工商管理，為將來買個保險，「唔知娛樂圈呢條路可以去到幾遠，透過呢科可以畀條後路自己，可能某一日冇今日嘅知名度，會開個品牌畀自己、做生意。」Windy就好想專注音樂方面發展，已決定選讀音樂科，「想將音樂做到極致，亦想學識作詞作曲。」

Chantel憑《這個姿態》奪得新城勁爆新媒體歌曲及勁爆躍進歌手。

Yumi開心獲得萬千星輝頒獎典禮「最具潛質新人獎」。

Windy在新城頒獎禮奪得「勁爆新人獎」。

Windy Chantel目標一致

3位小妹妹齊於今年踏入18歲，3月生日的Windy最想去植髮，「好耐之前已有呢個諗法，但係父母話『你成年之後可能覺得你個額頭OK』，但我依家都覺得唔OK囉。」另外她亦計劃考車牌，「主要係方便性，揸車可以帶屋企人出去玩。」，因16歲已可在新西蘭揸車，9月生日的Chantel正在當地學駕駛，「希望喺嗰邊考到個牌，到時轉返過嚟香港。」其次她亦想買六合彩，「一定要試1次，知道程序玩1次就足夠。」預備大個女的Chantel好多目標，亦好想做業主，「由細到大都好想有自己間屋，好鍾意室內設計，好想有個空間係自己1個人。1間近海望到海嘅獨立屋，另1間係近巿區嘅單位，方便啲。」不過她知道這個夢想好遙遠，「我知好貴，所以我會努力。」

Yumi恨 1個人去旅行

12月才滿18歲的Yumi，同樣立即想考車牌，但並非單純想代步，「14歲講到依家都話好想揸車，我鍾意得閒就遊吓車河，得閒去隔離買啲嘢，好期待咁嘅生活。」她更計好晒做車主的時間表，「我知香港報考車牌要等年幾，已經計晒條數，大概20歲前應該拎到個牌，買車同埋整埋保險等等，都要20歲頭，所以仲要一段時間。」1個人去旅行，亦是Yumi成年後最想做的事，「除咗返學差唔多都同媽咪一齊，好想試吓自己去旅行，鍾意做咩就做咩，好期待，我未去過歐洲，真係好想飛遠啲。」