獨家丨詹天文笑住擔心唱Live搞唔掂首出跳唱歌唔識死加強跳舞難度

更新時間：06:00 2024-01-26
發佈時間：06:00 2024-01-26

詹天文（Windy）一直恨唱韓式跳舞歌，早前終達成心願推出第2首派台歌《大雕刻家》，無論曲風同歌詞都是她夢寐以求，又唔識死要求排舞師排得勁啲，搞到擔心將來唱Live。期望可以攞到新人獎的她，如願在新城頒獎禮得到「勁爆新人獎」，令她開心有圓滿感覺。採訪：杜杜攝影：羅安強場地:Studio Meta

Windy知道有機會出韓式跳舞歌勁興奮，最難得連歌詞都好中，「監製問我想要點樣嘅歌，我冇咩頭緒，一聽demo就係我好想要嘅嘢，最難得連歌詞都好中呀！譬如『18歲如何靠支撐』我就快18歲好連繫到，仲有『I won't be down，I won't get down at all 』都講緊我性格，我係唔容易被打倒，歌詞都表現到出嚟。」

Windy去年底推出第2首派台歌《大雕刻家》。

Windy在《大雕刻家》MV中，大晒舞技。

組合個人新人獎攞晒

首次推出跳唱歌，Windy都有一定壓力，尤其是唔識死要求排舞師加強舞蹈難度，「最初排舞老師係排得比較柔和，我覺得好似唔夠勁，就要求勁啲，佢就話『咁我唔理唱歌嘞喎』，結果出嚟真係好勁，所以MV出嚟效果好好睇。」不過她完全冇預計唱Live時，可能會出問題，「真係要唱Live，可能都要調整少少動作，令到聲音更加穩定，如果唔係真係災難，所以都有少少擔心，哈哈！」

Windy為了露腰造型刻意控制飲食，每日只食兩餐。

Windy在新城頒獎禮奪得「勁爆新人獎」。

舉行樂壇頒獎禮前，Windy對奪獎已有少許信心，最終成功奪得新城「勁爆新人獎」，她開心有圓滿感覺，「可以企上頒獎舞台，已經覺得好榮幸，𠵱家After Class 攞過組合新人獎，個人都攞埋就更加圓滿，真係非常開心。」得獎後，她已計劃再推出新歌，更希望能像其他「聲夢」伙伴一樣，到外地拍MV，「我諗緊下首歌可能試R&B曲風，最想去奧地利拍MV，我去過旅行覺得嗰度啲景好吸引，仲有份好奇怪嘅熟識感，仲可以順便旅行就最好。」