獨家丨曾若華含淚剖白離巢華納：10年來不斷被拒絕出碟　做兼職婚紗攝影師賺錢繼續出歌

更新時間：07:00 2023-12-30
發佈時間：07:00 2023-12-30

31歲曾若華（JUDE）10月在ig宣佈跟華納唱片結束10年合作關係，她接受《頭條日報》獨家訪問剖白離開原因，跟「空頭支票」有關。雖然浪費了10年，但JUDE冇擔心，做兼職婚紗攝影師支持自己的獨立歌手夢，提到媽咪唔贊成，勸「止蝕離場」，她一度講到眼濕濕，強調想畀多一次機會自己先甘心。採訪：杜杜攝影：朱偉彥首飾:Maazi Jewellery

JUDE坦承這10年音樂路並不如意，希望做獨立歌手自己話晒事。

10月時，JUDE清空了ig，再出po宣佈離開華納。

10年前簽約時，JUDE只有21歲，以為人生一帆風順，到6、7年後覺得自己越嚟越沉，「女仔年紀越嚟越大，就會諗應唔應繼續呢？！但我好鍾意音樂，好多目標都未達成，如出碟、開個人Show。」對於發展，JUDE坦言完全唔滿意，「真係好唔開心，出歌係好基本，但係我就要過好多level，有好多制止，（公司）可能話遲啲先，另一個artist出先啦。」她曾向公司反映，最終都冇下文。

2015年，JUDE甫出道便奪得叱咤生力軍銀獎。

2020年初，JUDE推出《零分》，成為她首支兩台冠軍歌。

想退居幕後唔甘心

2020年1月，JUDE推出歌曲《零分》，成績不俗，更成為她首支兩台冠軍歌，可惜遇着疫情，完全零演出機會，雖然公司有乘勢為她推出《十分錯》及《醒》，可惜並非她所期望，「可能冇乜時間去諗點做宣傳，又唔係做緊我想做嘅嘢，因為方向都係佢哋決定，呢個係最大困擾，作為音樂人其實都想出自己嘅歌。」今年8月，有傳衛蘭和衛詩不滿華納將大量資源投放在張天賦及洪嘉豪身上，因而結束8年合作關係。JUDE坦言唔覺資源分配不均，但承認公司安排令她心灰，「公司想我行某個路線，雖然唔係我想做，但都會嘗試，但係見到啲新artist，佢哋做緊我想做嘅嘢，如唱英文歌，咁OK，我自己出嚟嘗試囉！」

JUDE跟衛蘭和衛詩，今年內先後離開華納。

對於同公司的MC獲力捧，JUDE理解公司安排。

JUDE的強項是作歌及拍MV，曾想過放棄幕前工作，但始終想完成心願，「好多網友都講『JUDE你不如做幕後，你中文又唔係太好，唱歌又唔係好勁』，我收到好多呢啲意見，有吸收同消化，其實認同嘅，但我又真係好想唱到自己寫嘅歌，真係我嘅夢想，𠵱家有機會跳出嚟，所有嘢都係我決定，連cover用咩字都係我決定，我畀最後一個機會自己，去表達自己想講嘅嘢，起碼試多一次。」

JUDE承認強項做幕後，不排除轉到幕後發展。

向Tyson Yoshi取經

決心向獨立歌手發展的JUDE，之前有向Tyson Yoshi及王嘉儀取經，「會問啲好技術性嘅問題，如點開公司。」她承認資金是最大難題，唯有靠副業幫補，「呢3年都有一個副業，就係婚照攝影，非常鍾意做，我之前係讀攝影，唔想嘥咗呢樣技能，同埋𠵱家所有嘢都係自資，真係好需要金錢，當係投資落自己身上。」她已計劃推出英文歌《Agree and Disagree》，暫時已花了5位數，「我諗做唔到6位數，我仲要生存，哈哈！」

JUDE搞婚紗攝影3年，並已開設ig專頁。

在JUDE的婚紗ig專頁，搵到陳詩欣跟老公靚相。

JUDE坦言家人一直很擔心她在娛樂圈發展，提起媽咪她更講到眼濕濕，「媽咪嘅角度，會覺得個女花咗咁多時間同青春，係咪應該快啲結婚呢？！係咪應該快啲穩定落嚟？！冇一個媽咪肯畀個女繼續追夢，雖然佢唔係金錢上資助我，但我住佢間屋，都係一個開支，好感恩佢哋嘅支持，我畀緊最後一個機會自己，承認係一個幾自私嘅決定，都希望做到我想做嘅嘢，一切畀個天去決定。」圈外男友好支持她發展音樂事業，暫未有結婚計劃，「我要搏殺做音樂，未必可以兼顧到屋企。」放手一搏的JUDE，講明不會再花10年青春在幕前發展，但一定會繼續做同音樂有關工作。