巾幗梟雄之懸崖丨黎耀祥胡定欣第8度合作展默契曾勵珍往橫店探班一招慰勞劇組

更新時間：15:20 2023-12-04
發佈時間：15:20 2023-12-04

由騰訊視頻及無綫電視聯合出品的《巾幗梟雄之懸崖》，由黎耀祥、胡定欣、蕭正楠、羅天宇、陳曉華等人主演，黎耀祥久違拍劇，令觀眾期待。《巾幗梟雄之懸崖》劇組於橫店馬不停蹄進行拍攝，助理總經理（戲劇製作）曾勵珍和製作部總監（戲劇製作）徐正康日前專誠前往橫店探班，為台前幕後打氣，曾勵珍還自掏腰包請食飯，氣氛愉快！

【相關閱讀】：巾幗梟雄4｜鄧萃雯撰長文吐辭演真相否認內地人氣急升拒接劇

【點擊睇《巾幗梟雄之懸崖》探班】：

視帝黎耀祥期間亦有萬歲請大家「喝飲料」，眾人更在寫上「英俊瀟灑、氣宇軒昂、玉樹臨風、全組最愛的祥哥又…又…又…又…又…又…請大家喝飲料！」的水牌前合照，熱烈又融洽。講到珍姐和徐生探班，黎耀祥受訪時說：「今次冇乜時間帶佢哋去玩，係最後一晚珍姐請大家食飯，佢睇咗片之後都好滿意，覺得成個製作都好唔同，既有 TVB 嘅特色，又有內地製作上嘅配合，好有大片嘅感覺！」黎耀祥透露是次拍攝行程十分緊密，差不多日日都要開工：「冇乜時間叉電，有段時間係 A、B 組咁拍攝，拍完 A 組就過 B 組，有時早咗少少收工就出去食飯。」提到與胡定欣第八度合作，黎耀祥說：「佢都算係我喺 TVB 合作最多嘅女演員，所以今次合作都好有默契，大家都會一齊食個飯，工作上有啲咩都會交流吓。」

黎耀祥胡定欣有默契

至於拍攝難忘事，黎耀祥說：「今次同好多內地工作人員合作，畀到我好新嘅衝擊，呢度地方比較大，個景都豐富啲，戲劇嘅效果都會加強咗，同埋監製（方駿釗）對我哋好好，佢專登安排咗啲飯盒係少啲油、鹽、糖，通常都係三菜一肉比較清淡啲，大家都食得好習慣。」在橫店工作雖然忙碌，但黎耀祥一有空都會出動「食好西」慰勞自己，黎耀祥日前在社交網介紹橫店港式茶餐廳，更成枱都是香港地道美食，有咖哩魚蛋、魚蓉燒賣、菠蘿包及叉燒等，黎耀祥全程大大啖食不停，相當滿足！

胡定欣忙到冇時間運動

胡定欣受訪時亦坦言日日都要開工，胡定欣說：「呢套劇通告好多好密，真係好少機會出去食飯，珍姐同徐生嚟咗大家可以早啲收工，大家一齊食個飯放鬆吓，如果唔係真係冇乜機會。」胡定欣坦言開工頭一個月特別忙：「我嘅銀行主景要連開十幾日，之後亦都有唔同嘅景連開幾日，第一個月真係好辛苦，冇乜點休息過，內地有說法叫頂天立地，即係頭場去到尾場都係你！」身材 Fit 爆的胡定欣熱愛做運動，可惜今次帶備運動裝都得物無所用，胡定欣說：「自己帶嚟嘅運動衫都冇郁過，反而一有時間盡量瞓番多啲叉電。」

胡定欣讚黎耀祥是學習對象

胡定欣指今次角色對體力、精神消耗比較大，拍攝期間消瘦不少，胡定欣說：「今次唔使做運動都消瘦咗，啲衫褲都鬆咗，係真係開住工瘦！我本身都少食澱粉質，但拍呢套劇消耗比較大，所以都一定要食飯，但係消耗實在太大，食完飯之後，拍完一兩場就已經開始肚餓！」至於今次再與視帝黎耀祥合作，胡定欣坦言：「同祥哥合作咗好多次，對上一次係《公公出宮》，都隔咗一段時間，每次同佢合作都係一個學習機會，好似再上堂咁。今次嘅角色同以往好唔同，要應付好多大場面同長對白，祥哥係一個好好嘅 Model，畀我去好好學習。」