歐錦棠爆拍TVB處境劇最好賺！月入最少XX萬效力亞視曾做到爆Show賺多近5百萬

更新時間：20:00 2023-11-24
發佈時間：20:00 2023-11-24

60歲歐錦棠近年轉型成為YouTuber，經營頻道《乜乜棠水舖》，不時帶觀眾「考古」分享香港歷史，講解一些電影小知識亦受網民追捧。此外，早年屬電視界多產演員的歐錦棠亦分享過不少電視圈秘聞！日前歐錦棠上載新片，大爆TVB及亞視的Show錢秘聞。

【點擊睇歐錦棠講解「Show錢」】：

歐錦棠1990年畢業於亞視訓練班，其後多年為亞視效力，成為亞視一線小生。歐錦棠在亞視時期代表作有資訊節目《今日睇真D》以及劇集《我來自潮州》、《英雄之廣東十虎》等。歐錦棠近日拍片分享電視界計Show的秘聞，直言當年在亞視時期幾乎年年做到爆Show。

歐錦棠講解電視台Show錢計算法

至於電視台Show錢如何計算，歐錦棠亦有講解：「首先你要知道咩係show，show唔係馬字邊風騷的『騷』呢個發音，應該係『show』。『show』就係…以英文嚟講係節目，又或者show up…你亮相都叫做一個show。我可以有兩個解釋，當時用我自己做例子，我最初簽亞洲電視嘅時候，1990年點計算呢，一般嚟講，其實長遠會用好多錢，每一個藝人正所謂佢有唔同需要，例如公司嘅衡量，你（被）用得多不多，換句話說你好唔好用，性價比好重要。咁點分呢？第一你Show錢有幾多，而家我已經脫節，我都冇問同事Show錢幾多，都唔係好多。以我1990年入行為例，當時Show錢1000蚊，有啲同事當時係700蚊至800蚊，我就1000蚊，當時我係新人一個。1000蚊，一年要簽幾個Show呢？一年要簽72個Show，計埋一年12個月，每個月做幾個Show畀佢（公司），好易，每個月亮相幾次，基本上一定可以。計算起嚟月薪係幾多？72個Show 1000蚊，6000蚊一個月。我做唔夠咁點呢？當你一個月7個Show…唔緊要，佢（公司）都照畀你一個月6000蚊，不過你理論上要做足畀佢（公司），呢個月你做唔夠，下個月你可能夠喇，會咁樣拉上補下。」而如果「爆Show」，就會逐個Show計錢，例如本身一年簽72個Show，而那年做了80個Show，即是多出8個Show，以1000元為一Show的價錢，即可額外多8000元收入。

歐錦棠：做主角最難「爆Show」

歐錦棠指做配角最易「爆Show」，反而主角除非同時開幾套劇，否則好難「爆Show」。而拍劇的計法原來都有不同，歐錦棠表示：「一般嚟講半小時計算，因為香港劇集習慣咗一個鐘其實冇一個鐘，44分鐘左右，有廣告時間，劇集內容就會有四部份出街，所以會以半個鐘形式計算，你前半個鐘出鏡一個Show，後半個鐘出鏡一個Show，如果我四Part都出鏡，都係計兩個Show啫。另外綜合節目，無論幾長都好，都係一個Show，一般嚟講綜合節目半個鐘起跳，好少會超過半個鐘。」不過原來都有例外，歐錦棠指當年亞視拍的《今日睇真D》，就曾將半小時節目計成一個Show，後期才改成包薪一個月任做，是一個雙贏做法。

歐錦棠亞視時期「爆Show」勁到攞獎

歐錦棠指當年在亞視時期，一年簽約70個Show，1996年歐錦棠同時做多個綜藝節目，包括《今日睇真D》、亞視港男、奧運會等節目，「嗰時冇拍劇，嗰年我做咗670幾個Show，即係爆咗600個Show，每個Show…我冇記錯就係8000幾蚊。」計算過後發現，原來當年「爆Show」賺多近5百萬元！

【點擊睇憶拍《烈火雄心II》險冇命】：

歐錦棠揭拍TVB處境劇最少月入17萬

歐錦棠2000年離巢亞視過檔到TVB，由於要「過冷河」因此直至2001年才正式加入TVB。歐錦棠在TVB時拍過不少處境劇，包括《同事三分親》、《畢打自己人》及《誰家灶頭無煙火》。歐錦棠直言由於日日要開工，幾乎集集都有他，因此年年都會「爆Show」，而歐錦棠的影片標題就揭示了拍TVB處境劇，可以月入最少17萬元！歐錦棠指：「『爆Show』當然係我哋最開心啦，寧願交稅都要『爆Show』。嗰時做處境喜劇好『爆Show』，《同事三分親》、《畢打自己人》…哇！一做就做年幾，《同事三分親》做咗3年，日日出、日日見，你話嗰條數唔大？」不過隨住更多網上影視娛樂平台誕生，電視台越來越難經營，歐錦棠指電視台為了不養太多員工，想出「一Show」約，即是一年只有一個Show做，而「三Show」、「六Show」約已算比較好，但當然亦有人做到「爆Show」，視乎是否多工作。如果沒有工作，只可拍電影，不可去其他電視台工作的情況下，很多藝員都怕收入大減，寧願離巢。

歐錦棠更指，如果有人接近「爆Show」亦有機會被截停再接工作，「佢哋後來會計到，同事比如一年簽60個Show，差唔多到頂喇，就截！唔再派工作畀佢，就唔畀Over show，唔使額外畀錢你。」歐錦棠認為此做法亦有好處，至少資源分配得比較平均，人人有工開，不過歐錦棠感嘆現實與理想往往難實現。