獨家丨陳欣健文雋慳錢拍《喝采》諗爆頭 鄭國江為歌名被改詐型43年
發佈時間：07:00 2023-11-06
1980年上映，陳百強（Danny）、張國榮、鍾保羅和翁靜晶主演的青春片《喝采》，相隔43年，經1年修復，最近以4K數碼修復版再度公映，適逢陳百強逝世30周年，並舉辦《為陳百強喝采•紀念展》。一班電影幕後功臣，包括監製兼演出的陳欣健（Philip）、編劇文雋、歌曲填詞人鄭國江，以及陳百強粉絲，齊齊細數這套經典電影及Danny點滴。採訪：杜杜
Philip當年經朋友介紹，認識由美國讀書返港的Danny，「佢好活潑，亦好感性，呢套戲佢好似做返自己，係最冇壓力嘅角色。」當年青春片並非主流電影，幾經辛苦才由孫泳恩搵到楊受成投資，因為要慳住拍，任監製的Philip要兼演 Danny叔叔，還要借出屋企作為Danny家的主景，「我有幾日唔喺度，返嚟間屋變咗紫紅色，好似西部片啲妓寨咁，老婆話有冇搞錯，為部戲冇所謂啦！」電影請得俞琤和黎小田等人客串演歌唱比賽評判，亦全靠文雋碌人情咭，「畀錢都請唔到呢啲卡士客串，明明編劇又跟埋去剪片咁，嗰時真係唔會計較。」
陳百強可以好Cute
主題曲《喝采》由Danny作曲，鄭國江填詞。鄭老師一講首歌笑言有投訴，「我寫時叫《鼓舞》唔係《喝采》，係鼓勵個女主角去做手術，上映時佢哋要宣傳改咗歌名，真係𤷪𤺧！關喝采咩事啫！佢去醫病仲要喝采，真係講笑！」而精益求精的鄭老師，在交歌詞限期前仍作最後修改，「當時我要去TVB交歌畀Philip，佢喺1廠拍我喺2廠等，突然間諗到『將一聲聲嘆息，化作生命力』，覺得好貼切個主題。」
陳百強歌迷會會長Lisa認為《喝采》記載Danny青蔥歲月，也展露偶像鮮為人知一面，「Danny比較內歛，就算我哋呢班fans成日見，佢都好少好熱情，我哋想知佢心情就係靠搵佢簽名時，佢有畫多個哈哈笑公仔，就證明佢嗰日心情好，其實佢都有活潑開朗一面，呢套戲難得將佢保留。」
《星島頭條》新網站有更多精彩內容：http://www.stheadline.com/
