獨家丨ViuTV大手簽《造星V》囝囝隨時組男團揭人氣王Owen及Kakit冇份簽約之謎

更新時間：08:00 2023-10-20
發佈時間：08:00 2023-10-20

《頭條日條》早前獨家報道ViuTV將跟10位《造星V》囝囝簽約，並於節目巡禮中公告加盟，報道出街後，大量造星迷都疑惑人氣極高，深受Fans熱捧的19歲賴天恩(Owen)及20歲鄧家杰(Kakit)點解冇份，對報道有好大存疑。《ViuTV 2024》節目發布會已於上周五舉行，簽約名單亦跟本報獨家報道的一樣。據知情人士透露，ViuTV有跟Owen及Kakit商討加盟，但兩位小朋友「太有理想」，最終傾唔掂數。撰文:何里玉

Owen及Kakit分別19及20歲，咁鬼後生喺呢行大把機會啦。

IG有2萬Followers，TG Group有1819名O2(Fans暱稱)的Owen，及IG有2萬4千 Followers，TG Group有2265名黨員(Fans暱稱)的Kakit在《造星V》由頭帶到尾，零負評又受廣告客戶歡迎，加上跳得，又唔算五音不全，最重要有超強觀眾緣，ViuTV將兩人收歸旗下真係百利而無一害。

呢個世界好大
節目發布會後，曾在訪問中透露會轉到香港讀書，全力在港發展的Owen出Po，表示會留在加州讀書，時機成熟會返香港，展示更多好嘢畀大家，言語間都相當無奈。據知情人士透露，ViuTV絕對有同Owen及Kakit傾合作。「聽公司講兩個後生仔好有理想，尤其想行單飛唱歌，唔想公司分散投資，時下做新人唔易，佢哋扭三扭四要求多多，配合唔到就無謂阻人發達啦。」從另一途徑得知，ViuTV的確想繼MIRROR後再組男團，希望集群體力量，易啲捧人。「新簽嗰班仔操吓先，睇吓之後點Group埋一齊，投資單人好辛苦，佢哋兩個唔想配合，咁就由佢哋嘞。」