獨家丨60歲莫少聰被指潦倒直認慳家罕談洪欣 16年自爆婚變原來從未離婚

更新時間：07:00 2023-08-08
發佈時間：07:00 2023-08-08

1988年，「大眼仔」莫少聰憑電影《中國最後一個太監》一炮而紅，在娛樂圈打滾逾30年，近年變得低調，之前有內地網民影到他以寒酸衣著做商演，又指60歲的他老態盡現，甚至指他離婚後獨力撫養女兒，所以生活潦倒。莫少聰以型男Look接受《頭條日報》獨家訪問，他先開心談及有留意香港娛樂圈，欣賞姜濤有上進心又直認生活慳家：「慳畀個女都好呀！」再強調，「我冇離婚。」更非常難得地談陳年舊愛洪欣及22歲大仔張鎬濂。採訪：方騫平攝影：朱偉彥場地：佐敦Mizu

近年莫少聰為妻女長居北京，趁11歲半囡囡莫芷嫣放暑假，便帶女返港探望中咗風嘅媽媽，而每次回港，聰哥都必定去街邊食最掛住的拮魚蛋，仲食到好滋味。16年曾在微博出PO稱跟老婆「未能攜手走到最後」的聰哥，大眾均以為他做咗7年單親爸爸，他對此作出澄清：「我有老婆，同孫雲玲結咗婚12年冇離過婚，佢唔係歌手，今次太太冇隨行。」他形容家庭生活簡單但美滿：「平日會親自做早餐，然後湊女返學，我好宅，大部份時間留喺屋企上堂學書法、讀吓歷史書、整吓嘢食，唔會出去應酬。」對於曾出PO自揭婚變，聰哥稱當年一時意氣，「兩公婆因為生活事鬧得不快，講咗一啲意氣說話。好彩之後雙方平心靜氣，再研究點去解決同點相處，𠵱家一家三口生活安好。」

生活簡單慳錢畀個女

因為疫情少做幕前工作的聰哥熱心公益活動，「𠵱家經營茶業小生意，亦有投資做媒體，內地生活冇香港咁大壓力，我哋只係食豬食雞，一年食得幾多呀？而且住北京郊區租金點都平過香港。」對於被指生活潦倒，連見得人嘅登台衫都冇錢買，聰哥笑言衣不稱身只係角度問題，當日屈喺架車兩小時等出場，所以坐皺咗麻質西裝：「我『登六』都唔再需求物質啦，食得飽開開心心，陪多啲個女，但都慳嘅，慳畀個女都好呀！」

拍戲親身四樓跳落街

聰哥自爆多年前TVB曾向他招手，離港多年的他好留意香港娛樂圈亦想回港拍戲：「有留意姜濤，呢個男仔形象健康又可愛，而且好有上進心。」他又有感而發，指時下做藝人好幸福，當年個個主角都有血有淚：「好記得拍《龍鳳茶樓》時因為替身跌斷腳，要親身上陣拍攝連串危險動作，由4樓跳落地下個貨車斗，再飛身落地跑去對面馬路，現場得3張『榻榻米』真係驚到腳軟，跳落貨車斗時好似跳樓咁，由於冇得NG就忍住痛係咁跑，期間聽到圍觀者話『呢個鏡頭真係多多錢都唔拍！』結果拍完一個月尾龍骨裂，一段長時間行唔到路，就算𠵱家都有好多舊患，不久前左手手肘要做手術。」聰哥說當年個個做主角都好摶，「劉德華拍《龍之家族》時都硬食武打演員狄威一腳，被踢暈啦。」當年搵埋辛苦錢，就供胞弟去美國讀書。

讚大仔好堅強有聯絡

提到分手N年的洪欣，訪問前強調唔想多講的他坦言，「雙方有自己嘅家庭咪幾好囉，最重要仔女好，佢帶住子女都唔容易，個仔𠵱家可以獨立，要畀多啲鼓勵佢行自己嘅路，有需要嘅，我永遠喺度，隨時畀電話我。」對於跟洪欣所生的22歲兒子張鎬濂，聰哥只稱有聯絡亦不想多談：「各有各生活唔好打擾佢，我個仔好堅強及明白事理，佢冇埋怨過我。」至於洪欣跟年輕10年嘅老公張丹峰屢傳婚變，聰哥眼中兩人係恩愛夫妻：「我覺得佢哋幾好呀，兩公婆耍吓花槍啫，希望大家都一齊幸福落去。」聰哥覺得感情事冇錯與對，唔適合就分開，日後仍可分工合作。