獨家丨徐偉棟試做導演搵媽咪雪梨演出衰怕醜被動浪費「星二代」光環

更新時間：08:00 2023-08-03
發佈時間：08:00 2023-08-03

徐偉棟（Edward）在新片《掃毒3人在天涯》飾演泰國國際刑警，首次用泰文講對白。父母為著名影星徐少強和雪梨，Edward 認同「星二代」有着數，但性格累事令星途非想像中平坦，決定改變被動怕醜性格，更積極向導演及攝影方面發展。採訪：杜杜攝影：朱偉彥髮型: Amber Tse@IL COLPO 化妝:@333stephiemakeup

Edward有個穩定女友，唔想高調，但結婚一定會跟大家分享喜悅。

在加拿大長大的Edward在《掃毒3》演泰國人，講英語對白冇難度，講泰文就要即場學，「因為疫情要喺雲南拍扮喺泰國，好彩有泰國翻譯幫手，講泰文唔容易，仲要留意語氣、停頓位同邊度重音，好彩都順利過關。」戲中還有不少動作戲份，但主要是槍戰未算難應付，「有場戲要坐吉普車衝落山驚險啲，製作組做足準備，好安全嘅。」

Edward拍《掃毒3》時，坐吉普車衝落山，是最驚險場口。

《掃毒3》中Edward跟飾演警察的古天樂，有不少槍戰戲份。

橫店舉行小型攝影展

40歲Edward不知不覺已入行14年，他坦認有「星二代」光環對起步有幫助，但往後發展都要靠自己，「爹哋媽咪都係做呢行，開始確係幫到啲知名度，但之後都要有作品令到大家記得。」對自己發展未滿意的他，認為性格是絆腳石，「我性格真係比較被動，又怕醜，都踏入4字頭，都真係要改變吓，未來會積極啲，會主動搵多啲機會，譬如會拍多啲片放喺社交平台，自己對製作都越嚟越有興趣。」

Edward好希望首部微電影，搵媽咪雪梨演出。

Edward早前跟爸爸徐少強合拍網絡大電影《俠女嚴詠春》。

在內地電視劇《長相守》，Edward難得跟爸爸和妹妹徐頴堃合作。

原來Edward已坐言起行，報名參加「創＋作」微電影比賽，「未來想多做幕後，導演係其中一方面，所以由拍微電影開始，今次希望邀請媽咪演出，不過佢要求好高，要整好啲劇本先夠膽開聲。」此外，Edward因疫情多空閒時間，亦對攝影產生興趣，更獲邀9月在橫店舉行小型攝影展，「做美指嘅朋友樂勤借出展覽場地，問我有冇興趣試吓搞個細細哋嘅攝影展，𠵱家揀緊作品，比較鍾意影人像，特別係女性，都係揀返呢類作品展出，係一個好新鮮嘅嘗試，希望繼續發展，會有人搵我拍啲商業作品。」