獨家丨李日朗入行20年受盡委屈:食死貓啞忍多年 傳為情癲咗翻唱《傻女》兼被騙300萬
更新時間:07:00 2023-07-17
發佈時間:07:00 2023-07-17

離開TVB 15年的李日朗(Don)去年初回巢,客串過幾集《法言人》,在《輕功》中演冇角色名的富家子,終於等到在新劇《靈戲逼人》演大奸角,戲份又多又有發揮。今年是李日朗入行20周年,冇大紅過但有人識,半紅不黑受過唔少委屈,最嬲當年翻唱哭腔版《傻女》,竟被指求愛不遂(蔣雅文)癲咗,又試過投資被騙去300多萬,不過有手有腳總搵到出路,早前他便考到牌成為日式小顏術師開拓新天地。採訪:方騫平 場地:小小堂

新劇《靈戲逼人》中李日朗先陷害張振朗抄歌,再𠱁蔚雨芯上牀,奸到出汁,他唔怕影響形象,笑說:「𠵱家啲人睇電視劇會放鬆咗,如果咁樣令到觀眾討厭我,證明我演技好ok,唔使做小顏術師啦。」他形容跟蔚雨芯嘅牀戲好皮毛,遠遠不及電影《性工作者十日談》,片中做變性人妓女跟鄧健泓有濕吻;另《踏血尋梅》演「四眼濟」嫖客,跟女主角春夏由牀做到去浴缸,仲第一次露股演出。

衰心軟被騙300萬

20年來,李日朗受過唔少委屈難於啟齒,「當年得21歲,做『細』嘅有咩事都會推落我度,冇辦法喎只得食死貓啞忍…」2015年,他重新演繹陳慧嫻經典金曲《傻女》,雖然勁Hit有50多萬點擊,但遭全城狂笑,指他受唔住蔣雅文婚訊刺激才唱得聲嘶力竭,更直指他求愛不遂癲咗,令他相當難受。事隔8年李日朗依然放唔低呢個心結:「好記得當年一瞓醒見到海量評論,但98%係負評,話我為情黐咗線,做音樂亂嚟,直至後期有音樂人挺身講返兩句,讚首歌有可聽性;亦有失戀嘅聽完話得到共鳴。」當年他自資6位數推出翻唱專輯《Fly Me To The Earth》是想做睇得見的音樂,「聽到啲歌腦海中自然浮現出唱歌環境及情景,如同百老匯歌劇,可惜被扭曲,辜負咗參與嘅前輩心血,仲累到佢哋俾人笑真係唔好意思,隻碟其實受發燒碟迷力捧,亦係我銷量最好嘅一張專輯,𠵱家得返幾十隻喺我屋企珍藏。」

2018年,李日朗作多方面投資,慘被相熟生意合夥人騙去300多萬,包含家人的血汗錢,搞到一鋪清袋:「最慘當中50萬用嚟拍電影《鐵璧男之拳》,對方話屋企有人患病要急用,一去冇回頭,因為冇咗50萬,資金變得緊拙,拍攝被迫延期,至2019年開始疫情,《鐵》片上映唔到變Total loss令血本無歸,只怪自己又蠢又心軟,係一次重大教訓。」問到有冇試過追數?他笑言「警都報埋」,最終當然追唔到,

2019年由他執導的電影《鐵璧男之拳》,因為被騙去50萬資金影響拍攝進度,最後胎死腹中。
2019年由他執導的電影《鐵璧男之拳》,因為被騙去50萬資金影響拍攝進度,最後胎死腹中。
Don將現實中玩唔到嘅元素放晒落片中。
Don將現實中玩唔到嘅元素放晒落片中。

轉型小顏師狂吸金

自問盡力做好每個Job的李日朗樂於被封娛圈「散打王」,「就算係『散打』都有咁多人記得我,都OK呀,呢20年由幕前做到幕後,由歌手進化到自資出唱片,2009年至2016年放棄香港市場去北京發展,咁勇敢都畀個讚自己,經歷令自己成長咗好多,感恩遇上每位好前輩,每個階段上天都賜我打不死嘅運氣。」目前主力經營小顏術師的他,靠一門專業手藝,生意愈做愈好,更開心晒命是20年來搵得最多。問到成功轉型,係咪已冚熄咗演藝團火?他坦認而且有不捨:「女友黃靜藍都支持我,最緊要做得開心及有滿足感,幫人重拾自信。𠵱家真係冇乜時間靜落嚟諗創作,情況好似打邊爐滾咗要收慢個火,等肚餓時再開火烚過。」

當年嫩口黎諾懿演李日朗哥哥。
當年嫩口黎諾懿演李日朗哥哥。

《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ