胡慧冲對泰國貢獻受肯定跟任達華米雪獲頒旅遊大使感動爆喊

更新時間：06:15 2023-01-27
發佈時間：06:15 2023-01-27

2015年在泰國四面佛發生炸彈爆炸事件後一個月，米雪、任達華及「泰國通」胡慧冲(Roger)曾應邀到已重修嘅四面佛祈福，振興當地旅遊事業。事隔8年，最近影帝任達華與米雪再應邀到泰國，跟Roger一起獲泰國政府旅遊局頒發「泰國旅遊大使」，其實Roger早於10年前已獲嘉許「泰國旅遊大使」，今次係第二次得到該榮譽。同時向3人發出The Thailand Elite Card精英卡，在5年內可以自由出入泰國，以肯定他們對泰國的貢獻。

胡慧冲跟任達華與米雪一起獲泰國政府旅遊局頒發泰國旅遊大使。

其實十年前胡慧冲曾獲頒發泰國旅遊大使。

獲嘉許嘅Roger喺台上激動爆喊：「因為泰旅局局長開始致詞時話欠咗我哋3個，當年四面神爆炸事件，佢好想親自答謝我哋，但各種因素下加埋疫情未能做到，𠵱家喺適當時候應該做返啲嘢，聽到我好感動，喺台上真情流露喊到好醜樣，相反華哥及雪姐加插嘅泰文致謝詞好得體。」

Roger聽到泰旅局局長致謝詞時激動爆喊！

Roger多謝政府旅遊局頒獎給他，對他認同。

3人幫過泰國振興當地旅遊事業。

華哥曾去過泰國過百次。

四日三夜嘅Friends of Thailand之旅中，「任雪冲」組合除了齊齊去拜四面佛外，又去著名的金佛寺參見僧王祈福及去唐人街食地道嘢，之後應曼谷市政府安排到唐人街出席晚會，Roger唱出《冲遊泰國》主題曲尾句「你要記住泰國冇問題」乘機唱好泰國。多天行程都有安排保鑣，隔開追住影相嘅途人，Roger說：「最深感覺係華哥及雪姐好親民，主動跟同fans影相及交談，華哥又好照顧我，自問大家都唔同grade，我又唔夠面皮厚做唔到攝石人，但華哥會叫埋我一齊合照，唔會掉低我；米雪仲會照顧同行嘅雪梨仔女，佢唔止係大美人仲係大好人。」

《星島頭條》APP經已推出最新版本，請立即更新，瀏覽更精彩內容：http://www.stheadline.com/