林作車匙跌溝渠全程齋睇裕美出手撈起被鬧唔係男人原來專登試女友？

更新時間：18:30 2023-05-31
發佈時間：18:30 2023-05-31

人稱「抽水王」的林作經常於社交網評論社會上大小事情，即使不幸有人身亡，都會被他「抽水」一番，因此惹來爭議不絕。雖然經常焫着火頭，但其女友裕美就對他不離不棄，經常形影不離外，最近她更為照顧男友做出一個「最佳女朋友」的事例，就是不怕骯髒，在沒有任何保護下，徒手伸入溝渠為男友取回車匙，其貼心舉動獲網民大讚，紛紛指這麼好的女友娶得過，相反網民卻不屑林作站在一旁的所為。

【點擊睇裕美為林作執車匙】：

林作與裕美日前到北角食糖水，怎料在店舖外跌了車匙入坑渠，他即時把握機會開IG直播，直擊女友用鐵線勾起車匙的過程，林作之後再上載全長六分鐘的片段並留言：「突發！我條Tesla鎖匙跌咗落去！@wadahiromi 全靠你了！神奇技能！日本人的創造力！」只見裕美坐在路邊一手包辦，試過用手想抽起渠蓋但因太重放棄，之後一邊用手機燈光照明，一邊用鐵線捲成圈狀，意圖勾出車匙。

不過林作就在旁邊只顧拍片，完全沒有幫忙，並發揮「口水佬」本色不斷旁述，裕美即說：「你唔幫手唔好咁多嘢講！」裕美更霸氣表示：「想盡快返屋企，等我搞！」經過多番努力，加上耐性及一雙巧手，裕美終於成功取出車匙，林作相當驚喜，大讚女友厲害，「好勁呀佢撈到！Oh my God！神奇技能！日本人的創造力！」

網民大讚裕美「女友力MAX」，「好欣賞她！有腦，唔怕污糟」、「美美真係唔話得！簡直係大膽演出」、「一個坐街邊坑渠執車匙嘅女人，勁過陪你食麥記嘅女人」。相反，網民則批評林作︰「正確做法可以打1823，會派渠務署幫你處理。男人要個女人幫？唔適合」、「美美好好，娶得過，唔怕污糟，個男人拎住部電話齋talk，唔幫手」、「要個女人幫你伸隻手入坑渠執嘢？再一次證明矮仔作唔單止矮，仲要唔係男人」。

林作之後亦有上載另一段帖文稱：「我公開挑戰全港有女人士：你試試扮跌咗嘢落水渠，然後睇下你身邊女伴咩反應。咁你就知佢係人係鬼。有時，你唔洗（使）試都知。我以前啲女，根本理得我死。美美？佢仲緊張過我。仲要有咁嘅創造力。會考0分？全因功力去了這裡。」有網民卻留言指裕美：「你以前拍電影做茄喱啡梗係理得你死，而家你搵到水魚幫你跑數咪幫你執車匙囉」，裕美隨即反駁：「我仲要幫埋佢（林作）搵錢，我仲要俾人話佢養我，真係谷鬼氣！如事實佢養緊我就好，我一定第一個衝岀來講，因為能被包養絕對唔係一件容易既（嘅）事。值得表揚」。