全民造星V丨花姐卸任監製因節目已經冇意義 Jay Fung不忍阻人追夢遭反問：定係辭職呀？

即時娛樂

更新時間：14:31 2023-05-16
發佈時間：14:30 2023-05-16

ViuTV真人騷《全民造星V》昨晚（15日）首播，今次由陳蕾﹑陳健安﹑馮允謙和韋羅莎擔任導師，過往擔任《造星》系列監製的黃慧君（花姐），今次忽然退任《造星Ｖ》監製一職，改由許敬麟出任，在節目上剖白退出原因：「呢個節目已經對我冇意義喇！」不過她仍有參與面試的工作，試過因Jay Fung不忍心太狠心對參賽者，一度離場休息，結果遭花姐直接問「係咪辭職呀？」又試過睇完主題曲的排舞後後直言今屆質素係比較差：「你哋呢啲咁嘅質素，上到節目都係畀人恥笑㗎啫！」

【點擊睇《全民造星V》首集片段】：

花姐與On仔（陳健安）、陳蕾、Jay Fung（馮允謙）和韋羅莎四位導師傾完偈後，覺得Jay Fung太斯文、太Nice，睇死他難以管教參賽者及唔識鬧人，到了面試階段要淘汰參賽者時，Jay Fung難忍自己「做衰人」，阻住其他人追夢，搞到他忍唔住表示：「I don't like this!」並一度離場，其後與花姐對話期間，他提到自己對住其中一個參賽者講：「我唔想睇你」時，感覺很傷害對方，心理唔好受，花姐嘗試開解佢：「你唔好覺得你hurt咗佢，你要記住你係幫緊佢！」、「直接唔係一個問題，你唔好內疚，如果唔係你過唔到呢個節目㗎！你會好辛苦㗎！」可惜Jay Fung一度難以釋懷，花姐忍唔住直接問佢：「定係（你想）辭職呀？」Jay Fung表示參加呢個節目都係佢嘅一個成長。

其後花姐在節目中亦有談及不再做監製一事，她哽咽說：「呢個節目已經對我冇意義喇！而家講搞唔掂呀，我想話《造星I》，對我人生好大轉變，因為擔任首輯節目監製，所以我覺得自己好投入喺節目入面，我覺得節目好好睇。跟住創造咗MIRROR同ERROR。去到《造星II》開始，因為我轉咗身分，可能嗰刻所做嘅都係為咗MIRROR，去到《造星III》，我心諗我做緊乜嘢，我係為咗乜嘢？《造星IV》係為咗COLLAR？但其實我又唔係真係好投入，呢個節目對我嚟講已經係...唔知呢？」到了主題曲MV排舞當日，花姐睇完表演後直言：「你哋呢啲咁嘅質素，上到節目都係畀人恥笑㗎啫！鬧唔落呀呢班，真係太差喇！呢班搞唔掂呀！」