同屋企人去旅行丨Patrick Sir兩歲仔學包糭猴擒偷食勁可愛 關宛珊做一事搞喊老公
發佈時間：19:00 2023-05-11
TVB旅遊節目《同屋企人去旅行》近日熱播中，本周播出的行程是Patrick Sir（林溥來）、太太關宛珊和囝囝Preemo，一家三口到廣州體驗親子遊。今晚（11日）播出一集首站是室內滑雪場，惟一開始已出現重大危機，Preemo扭計不願換上滑雪裝爆喊，幸好Patrick Sir 和關宛珊最終𠱁掂仔仔換衫，Preemo之後亦玩得不亦樂乎，瀡冰滑梯更開心得嗌Encore，非常可愛。
【相關閱讀】：同屋企人去旅行丨關禮傑自爆不願讓女兒入行 關楓馨一聽到爸爸個名爆喊
【點擊睇Patrick Sir一家去旅行】：
Patrick Sir一家三口更去到荔灣湖公園，坐住艇仔品嚐源於荔灣的艇仔粥，夠晒正宗。之後一行人去到靜山湖的生態園區，鍾意動物的Preemo親親小動物餵牠們吃東西，期間不慎被羊駝咬到手指仔，但他相當叻仔沒有哭出來。Patrick Sir亦不讓兒子專美，挑戰公園內的越野車電掣風馳一番。
最後一站去到豎德生活館，當中雲集不少咖啡店和書店，是著名打卡熱點，關宛珊期間被書店掛着的金句「我無限熱愛新的一天」及「我願意在此，看你長大」觸動，關宛珊哽咽說：「Preemo 每日都喺度變緊，每日都有新嘅嘢畀到我哋，好唔捨得佢咁快咁大個。」Patrick Sir 聽畢亦感動得眼濕濕。
而明晚（12日）播出一集，林家三口去到盈香生態園遊玩，並挑戰全景玻璃橋，人仔細細的Preemo 十分大膽，不單直接趴在玻璃上睇風景，更興奮地拔足狂奔，對比起媽咪關宛珊 的驚青樣，相映成趣。之後Patrick Sir兩公婆去到幸福交換店，該店專門收集舊物，除了可以現金買東西，還可以以舊物交換物品，二人帶了一本陳奕迅琴譜來交換，並會細說背後的浪漫故事。
林家三口還會去到肇慶學包裹蒸糭，原來最正宗食法是將糭切開再撈埋，寓意撈到風生水起。之後三人到七星岩游湖兼食好西，關宛珊食飯期間投訴老公沒有正式送過花：「其實送過一次畀我嘅，嗰次做舞台劇，以為得我有啦，但原來每人都有一枝，我以為自己嗰個會特別啲，點知都唔係，全部人都一樣！」知衰的Patrick Sir即時在褲袋變出一枝花送給老婆，非常冧豬。節目尾聲，Patrick Sir 約了老婆在酒店大堂見面，並送上親手製作的驚喜，豈料關宛珊竟出其不意回敬了更大的驚喜，最終兩公婆相擁而泣。
