SoChing退團丨Winka轉軚稱「8-1=0」變歸零重新出發遭網民寸爆：唔教人計數啦咩？

更新時間：17:00 2023-05-10
發佈時間：17:00 2023-05-10

COLLAR成員之一的Soching（蘇芷晴）男友李啟言（阿Mo）在去年MIRROR第4場紅館演唱會，因突然有巨屏於半空急墜而身受重傷，當時So Ching每日都前往醫院探望及陪伴住阿Mo，期間有網民在隊長Gao的IG直接留言「SOCHING快退隊」，隊友Winka截圖在限時動態上霸氣回應：「可以不愛，但不要傷害。我今日教你計條新數「8-1=0」，唔識計嘅，就死記咗去吧。」今日Soching宣佈退出COLLAR，MakerVille臨時召開「COLLAR最新動向發布會」，會上Winka亦為當日的言論解畫。

【相關閱讀】：SoChing退出Collar突宣佈今午開記者會頒獎禮八欠一已惹揣測

【點擊睇Winka霸氣回應】：

有傳媒問到當日「8-1=0」，但現時即使So Ching退出，但COLLAR仍然繼續走下去，會否因此而感到壓力？Winka說：「其實當時『8-1=0』呢個說法，係我自己個人好想畀一個力量Soching，話畀Soching聽我哋之後嘅團歌，又或者一啲新嘅作品好想等埋佢返嚟先做，但係佢而家有咁嘅決定，我哋係一定要尊重同接納。」Winka續說：「咁8減1等於0，我哋而家歸零，所以我哋重新出發，希望大家繼續支持我哋之後嘅作品，同埋之後我哋7個人都會繼續試唔同嘅新嘢同試唔同嘅作品，希望大家都會繼續支持我哋，或者我哋都會繼續努力做好表演。」

對於今次Winka轉口風「歸零」，不少網民留言表示「唔收貨」，紛紛湧到討論區留言，有人說：「不如真係畀佢哋歸零，我決定unfollow 佢哋全部」、「唔教人計數啦咩？唔識計同我死記喎」、「當初畀人攻擊就「8-1=0」我哋8個一條心，依家有人退團「8-1=0」零係解重新出發，即係當初就打算放棄自己口中好隊友，多佢一個唔多，少佢一個無所謂咁？」

自從男友出事後，Soching全面停工逾五個月，COLLAR亦因此被迫休團，直至今年元旦日舉行的《叱咤樂壇流行榜頒獎典禮》才齊人復工，期間Soching面對壓力和傷心，試過在社交平台上轉發為舞蹈員發聲的貼文，間接表態批評ViuTV及MarkerVille，甚至取消關注公司社交帳號，當時已經有網民揣測Soching會退出COLLAR。接着有網民到COLLAR隊長Gao的IG留言：「So Ching快退團」，Winka隨即截圖在限時動態上霸氣回應：「可以不愛，但不要傷害。我今日教你計條新數「8-1=0」，唔識計嘅，就死記咗去吧。」其後Marf、芯駖及Ivy So亦有轉發Winka發文並說：「We are COLLAR」！