黃文慧·專訪｜曾開酒店擁十幾層樓 為事業失嫁豪門機會 擲18萬準備身後事
發佈時間：10:30 2023-04-09
縱橫演藝圈57年的資深演員黃文慧（Bonnie姐），過去曾參演無數電影、劇集和舞台劇，由於演繹潑辣奶奶及邪牌反派居多，因而在觀眾心中留下硬朗形象。然而私底下，72歲女人仔黃文慧年輕時同樣強勢，當年為闖一番事業，她不惜把精神時間全奉獻給幕前及生意，結果一生工作耽誤了愛情。經歷大起大跌後已年華老去，仍屬單身貴族的黃文慧卻無怨無悔，所謂「Never too late（有心唔怕遲）」，近日宣傳主演電影《死屍死時四十四》時，她笑言：「我錯過少女年代嘅浪漫拍拖鬥紅鬥豔，而家就要過我少女時代嘅生活……」
【點擊睇黃文慧從演之路】
由何爵天執導的電影《死屍死時四十四》，以黑色幽默方式諷刺香港樓價高企的荒謬現實，飾演業主Betty的黃文慧與老伴Boron（劉江飾）預早計劃身後事，甚至選定將來下葬的墓地。現實中，原來黃文慧在疫情前已擲18萬元，透過行內朋友在家鄉澳門買下龕位，惜至今仍未有下文，她無奈道：「我去望過，環境好靚架，Design得嚟唔似嗰啲嘢，不過唔知係咪泡咗湯，呢三年幾我打畀佢都有覆，但一提龕位就唔睬我，面對面問佢又話『得啦，我同你保管唔好咩』，希望呢單嘢唔好不了了之啦。」
當談及立遺囑一事，雖慨嘆現時「一無所有」，但黃文慧愈講愈起勁，私下如傻大姐的她還展現女強人一面，細訴昔日投資、創業的風光事跡。1966年出道的黃文慧，曾效力無綫、亞視、港視及ViuTV，拍過不少劇集與電影，尤以《射鵰英雄傳》中「梅超風」一角及《嚦咕嚦咕新年財》扮演腦退化症奶奶最為人熟悉。其間她一度淡出創業，先後跟友人合資時裝入口公司、燒臘店及日本餐廳等，至80年代初拍畢《京華春夢》，黃文慧修讀酒店管理證書課程後，跟同學和姐夫北上開設廣州富豪酒店，「嗰時一隻杯、一粒方糖、一包麵粉、牀褥被鋪……全部係我同女秘書一齊去搵供應商，我哋推住架Lobby行李車沿太子道運上車再直送廣州，啲苦處唔講，但我係鍾意創一啲嘢出嚟，好嚮往喺工作上攞成就感。」
工作耽誤愛情 單身仍不放棄
最高峰時期，黃文慧坐擁兩間酒店及十多個物業，包括西灣河鯉景灣、屯門黃金海岸及澳門十個單位，惜後來遇上社會動盪，如今只剩下當年買給父母的一間居屋，但她仍豁達面對：「你個命運、人生就係咁，咪順境去做人囉，怨得邊個！幾十歲人仲求咩呢？有瓦遮頭咪算囉。」除資產損失外，黃文慧亦賠上青春，自認工作狂的她當年寧選麵包不顧愛情，導致錯失良緣單身至今，「我以前都唔憧憬愛情、唔浪漫架，我鍾意柴娃娃一班人BBQ、游水、跳舞，玩到攰第二朝又開工。嗰時好多台山嬸娘介紹美國阿伯啲仔畀我，我相睇過幾次，但廿幾歲百厭妹邊肯嫁，如果結婚就要離開呢個圈，我咁辛苦入行，一啲成績都冇就走唔甘心嘛，可能嫁咗都離婚嘅，命運呢鋪我唔敢賭。」
回想少女時代的戀愛史，黃文慧稱過去兩前度都是名門望族，差一步便嫁入豪門，惜強硬個性致戀情無疾而終。不過，當時年輕貌美的她也不乏追求者：「好多狂蜂浪蝶嗰啲我唔會騷佢，追我啲男人個個都有名譽地位，但我唔甘心做小三，我自己都出嚟跑江湖，使咩要咁啫。」愛情上抱持「佛系」心態的她，後來一直遇不到合適對象，但單身多年也從不覺遺憾。那麼現時可望脫單？黃文慧笑道：「可以嘅，我而家Single and available。（擇偶條件？）我鍾意有性格、令我佩服佢嘅，同埋好似劉老師咁嘅Look，乾乾淨淨，如果早遇到佢（指劉江）我實吼住佢。」
採訪：黎寶倫
攝影：鄧國良
化妝：Yannis Yip
髮型：Louis Tse@Number 8 Salon
【其他文章】：
姜大衛三代同堂遊廣州孫仔高過公公 曹永廉12歲細女晒長腿星味濃郁
《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料: https://bit.ly/3IMunqd
你的獨家報料一旦被採用及報導，將獲得乙份獎品。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
