「順嫂」梁葆貞罕談亡父梁醒波當年到廣州探望崩潰痛哭 曾拒入TVB怕爸爸冇面
發佈時間：20:30 2023-01-29
TVB經典處境劇《香港81》系列、現年86歲的「順嫂」梁葆貞，父親是已故演藝界名宿、南洋粵劇界四大天王梁醒波，她早前由加拿大返港，驚喜與顏國樑現身《萬千星輝賀台慶2022》。梁葆貞日前接受姪仔梁智宏的網上頻道訪問，大談與父親梁醒波當年相處的點滴，以及她做花旦時的藝名「白梨香」，原來是由著名劇作家唐滌生為她取名。
【相關閱讀】：萬千星輝賀台慶2022｜「順嫂」梁葆貞驚喜現身零老態！ 86歲貴氣逼人勁優雅
【點擊睇梁葆貞與爸爸梁醒波相處點滴】：
梁葆貞指爸爸波叔對每個仔女都咁好，是典型的慈父，不過她以「三叔」稱呼父親：「因為佢叫阿爺做『三叔』，可能佢好錫佢老竇啦，所以叫我哋跟返叫『三叔』作為紀念。」梁葆貞憶述虛齡17歲時在內地開始做戲，怎料一上去就突然「落閘」不能返回家鄉，後來波叔於五十年代前往當地探望：「幾廿年冇見，一見到佢白髮蒼蒼，啲眼淚巴巴聲，佢好真囉！我話『你唔好喊啦！見到我開心吖嘛，我好好喎！』我嗰陣時生活係好好嘅，喺文化局做出納，我生咗個女，要人工哺乳，所以我申請離團。」
兩父女閒談期間，波叔表示想去睇她住的地方，生活如何。去到後波叔感覺地方好細，二人傾到半夜時，波叔突然肚餓，梁葆貞就煮麵招呼爸爸，怎料波叔拿起碗麵說：「冇油喎！」梁葆貞當時坦白表示一個月只得4両油，碗麵已經落好多滴酒，波叔聞言眼淚直流，之後更每年託人送油給女兒。
之後為了梁葆貞的仔女有更好的生活，波叔主動出人情牌，要求當時的文化局放人，讓梁葆貞帶家人返港。返港後梁葆貞因未有工作，一度投靠爸爸一齊生活，她直言印象中的父親是一個「好完美嘅慈父」，因好多人「嫁出嘅女等於撥出嘅水」，但波叔為她操心，更考慮埋孫兒的發展：「佢又眼淺㗎喎，好易喊㗎，性情中人。」波叔曾提議梁葆貞入TVB拍劇，不過遭她拒絕，因擔心波叔的名氣大：「我話『唔好啦，你波叔個名咁大，人哋托你手踭你真係好難落台㗎。個面子過唔到，你唔係普通人嘛。咁大個面子，都係唔好啦。』」
而梁葆貞在《香港81》中飾演順嫂的契機，原來亦與波叔有關，她說：「波叔過身嗰陣，TVB做喪主。我喺（喪禮）度燒金銀衣紙，就被睇中咗。」《香港81》當時要新面孔，劉天賜睇中她肥肥哋，又咁上下年紀，然後知道她曾拍過電影，覺得不用培訓，就加入TVB。之後她見到劉天賜就向對方道謝：「賜官，好多謝你畀呢個角色我，我搵到第一桶金。」劉天賜反而指她：「我亦多謝你做活咗呢個角色，做活咗順嫂。」梁葆貞自《香港81》開始直至《香港86》，一直飾演「順嫂」，她坦言六年來沒有放過假，因與TVB簽10個show，最後做足20個，出鏡率高等於每月出雙糧，加上當年接拍廣告及電影，賺到第一桶金供仔女到外國升學。
【其他文章】：
鍾楚紅62歲春風滿臉性感透Bra若隱若現 去紐西蘭旅行睇羊駝
梁家輝稱孖女3歲前冇見過爸爸「眼淚往心中流」 網民踢爆真相原來係咁
78歲白韻琹憔悴現身友人壽宴臉色暗沉 多次傳患腦退化謝偉俊曾直認老婆失魂
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
