Cally - 五一商場消費熱潮 商戶生意額升12%母親節續發力 | 商界講呢啲
Cally
2025-05-07 02:00 HKT
字體大小
五一黃金周啱啱過咗，新鴻基地產（新地）12間商場嘅人流同生意額都錄得雙位數字增長添，上水廣場、屯門卓爾廣場同錦薈坊呢啲近關口嘅商場，人流明顯上升，旅客集中選購高價單產品，如鐘錶金器、蔘茸海味、電子產品等，部分電器商戶更錄得雙位數銷售增長，不少得來港內地客嘅消費力。
新地今次斥資800萬做推廣，多間商場聯乘大眾點評、小紅書、高德地圖同支付寶合作，派發出行禮包，旅客買嘢、搭車、食飯都有折扣。商場同名牌美妝同珠寶品牌搞活動，帶動整體商場表現，新地代理(銷售及租賃)董事鍾秀蓮表示「唔少旅客專程選購鐘錶金器、美妝、蔘茸海味、電子產品等熱門產品。」例如上水廣場嘅「智能美妝點餐機」分析個人特徵推薦美妝組合就大受歡迎。
眼見母親節就嚟到，多間商場一於乘勝追擊，東港城送12部iPhone 16 Pro Max，將軍澳中心推1折優惠，北角匯搞親子跑，PopWalk天晉滙推出將軍澳南海濱遊主題活動，Mikiki仲有花藝工作坊，所有商場嘅餐廳訂座率已經去到八成，到時熱鬧情況可能會超越五一都唔定！
