KellyChu - 美酒佳餚巡禮15.5萬人次進場400間餐廳酒吧接力「品味全城」 | Executive日記

更新時間：02:00 2024-10-29 HKT
發佈時間：02:00 2024-10-29 HKT

　　由香港旅遊發展局主辦嘅「香港美酒佳餚巡禮」周日圓滿結束，5日活動共錄得15.5萬人次進場，比去年升約一成。除咗市民旅客玩得開心盡興，參展商亦認為活動成功帶動消費，生意比預期更好。

　　今年活動加入咗新元素，包括將時間延長多一天，以及擴大中國展區和引入更多產酒區嘅佳釀。連續兩晚舉辦嘅「周末鬼馬派對」，頭300名以萬聖節服飾進場人士可獲「品酒券」，吸引唔少參加者悉心打扮，推高派對熱鬧氣氛。活動期間本港有3艘國際郵輪停泊，成功吸引包括美加澳、日韓及東南亞等地旅客進場。

　　有清酒參展商話，原本預期蝕錢，結果第一日已有賺，形容參展「賺到錢又有宣傳成效」，下年會繼續參加。另有酒商指，政府調低烈酒稅有助部分產品減價促銷，反應理想。

　　旅發局於10月28日至11月30日，聯同城中近400間餐廳及酒吧推出「品味全城」，合作夥伴包括高級食府及得獎酒吧，送上各式餐飲禮遇，如提供6折優惠、半價菜單等，延續美味之旅。

KellyChu