KellyChu - 港健兒發威 先後打破香港紀錄 2中長跑好手征日創佳績 | Executive日記
KellyChu
2024-06-12 02:00
字體大小
香港中長跑運動員陳偉聰（Wesley）及林穎璋（Vincent），喺剛過去嘅周末參加日本東海大學長距離競技會，先後打破香港紀錄，非常叻仔。Wesley於男子1500米跑打破塵封逾半世紀嘅港績，Vincent就喺3000米跑首次刷新香港紀錄。
Wesley以3分55.31秒完成男子1500米賽事，以0.29秒之差打破Dave Gibson喺1972年創下嘅1500米舊香港紀錄。Wesley指，今次並非突如其來嘅驚喜，而係同教練一直以嚟溝通及努力嘅成果。
26歲嘅Wesley剛從大學畢業，目前兼職教小朋友跑步。佢認為，自己今次嘅成績證明咗「香港唔係做唔到」，希望鼓勵更多年輕跑手，到外國感受一下高水平賽事。
Wesley喺去年12月所創下嘅3000米港績（8分40.17秒），則被港隊代表Vincent改寫。Vincent以8分33.36秒衝線，將紀錄大幅推前接近7秒，生涯首次成為香港紀錄保持者。
Vincent喺早前三場賽事發揮未如理想，最後一場以好成績為旅程畫上句號，令佢難掩興奮心情，話好高興可以喺日本取得人生第一個香港紀錄，形容整個準備過程充滿起伏，多謝支持佢嘅朋友及教練。
Vincent兩年前入讀教大進修體育教練與管理碩士，同時轉為全職訓練，投入跑步事業。佢今年狀態大勇，年初先喺香港渣馬半馬賽事勇奪全場第二，其後於香川丸龜半馬刷新個人最佳成績，3月再喺日本靜岡馬拉松造出2小時19分54秒，成為香港歷來第4位全馬Sub220跑手。
KellyChu
香港長跑好手林穎璋(Vincent)喺3000米賽事首次刷新香港紀錄。
更多文章
