KellyChu - 葡萄牙藝術家太古坊個展 帶人走入萬花筒森林 | Executive日記
![「Enchanted Forest 」反映對香港嘅體驗同埋感受。](https://image.hkhl.hk/f/686e386/0x0/100/none/61835ef37cf2937d8ace66bd1214496e/2024-03/WNN07P05250324_.jpg)
太古坊最近展出咗兩件由葡萄牙視覺藝術家Joana Vasconcelos創作嘅巨型編織裝置,其中一件裝置名為「Enchanted Forest」,係由60人嘅團隊共同歷時半年完成,裝置喺黑暗中閃閃發光,走入其中,令人彷彿置身喺萬花筒森林,原來創作背景係同香港有關。
Vasconcelos話,「Enchanted Forest」係反映咗佢對香港嘅體驗同埋感受,因為喺佢眼中,香港嘅城市建設就好似一片由當代混凝土樹木組成嘅壯麗森林,每當夜幕降臨,無數燈光照亮四周,森林便煥發勃勃生機。
另一件編織裝置「Valkyrie Seondeok」,七彩斑斕極吸睛!Vasconcelos希望藉它向曾經啟迪人心嘅亞洲女性君主善德女王致敬,展現積極嘅正向能量,同時引導觀者對當代女性地位、個人與社會身份等議題作深層對話。
今次係Vasconcelos喺香港嘅首個個展,創作靈感源於Dior 2023/2024秋冬系列時裝騷上,由佢操刀嘅大型編織裝置,所以兩件作品都係用返Dior當季嘅布料製作。
「Enchanted Forest」現正於太古坊ArtisTree展出,「Valkyrie Seondeok」則懸掛於太古坊二座大堂,展期至4月28日結束。
KellyChu
![「Valkyrie Seondeok」向亞洲女性君主善德女王致敬。 「Valkyrie Seondeok」向亞洲女性君主善德女王致敬。](https://image.hkhl.hk/f/1024p0/0x0/100/none/7f423eb51abf1efaebdec5eeb9c0d076/2024-03/WNN07P08250324_.jpg)
「Valkyrie Seondeok」向亞洲女性君主善德女王致敬。